ප්රචාරණ කටයුතු සඳහා භාවිතයට ගන්නා දැන්වීම් පුවරු සහ අනෙකුත් අලංකරණ විදුලි පද්ධති සඳහා විදුලිය විශාල වශයෙන් වැයවන බැවින් එය සීමා කිරීම තුළින් රටේ විදුලි පරිභෝජනයෙන් සැලකිය යුතු ප්රමාණයක් ඉතිරිකර ගැනීම සම්බන්ධව රජයේ අවධානය යොමුවී ඇතැයි වාර්තා වේ.
බලශක්ති සුරක්ෂිතතාව පවත්වාගෙන යාම වෙනුවෙන් තවදුරටත් ගතහැකි ක්රියාමාර්ග පිළිබඳ සොයා බැලීමට ජනාධිතිවරයාගේ ප්රධානත්වයෙන් ඊයේ (23) පැවති සාකච්ඡාවේදී මේ පිළිබඳ කතා බහට ලක්ව ඇත.
ජනාධිපති ලේකම් කාර්යාලයයේදී මෙම සාකච්ඡාව පැවැත් වුණි.
පළාත් පාලන ආයතන මට්ටමින් බලශක්ති පරිභෝජනය විධිමත් කළමනාකරණයකට ලක් කිරීමට ගත හැකි ක්රියාමාර්ග පිළිබඳ එම ආයතන සමග සාකච්ඡා කරන ලෙසද ජනාධිපතිවරයා මෙහිදී නිලධාරීන්ට උපදෙස් දුන්නේය.
නාගරික වශයෙන් පවතින අත්යවශ්ය නොවන වීදි ලාම්පු භාවිතය අවම කර ගැනීම සහ බලශක්තිය කළමනාකරණය වෙනුවෙන් ප්රවාහන සහ මහාමාර්ග අමාත්යාංශය විසින් ඉදිරිපත් කරන ලද යෝජනාද මෙහිදී සාකච්ඡාවට ලක්විය.
ඊට අදාළව අනුගමනය කළ හැකි විකල්ප ක්රමවේදයක් පිළිබඳ අදාළ සියලු පාර්ශ්ව එක්ව සාකච්ඡා කර කඩිනම් ක්රියාමාර්ගයකට එළැඹීමේ අවශ්යතාවය ජනාධිපතිවරයා මෙහිදී පෙන්වා දුන්නේය.
මෙරට දෛනික බලශක්ති පරිභෝජනය වැඩිම කාල පරාසය වන පස්වරු 6 සිට 10 දක්වා කාලය තුළ බලශක්තිය මනා කළමනාකරණයකින් යුතුව භාවිතය පිළිබඳ ජනතාව දැනුවත් කරමින්, ඔවුන්ගේද දායකත්වය ඇතිව රටේ බලශක්ති සුරක්ෂිතතාව පවත්වාගෙන යාම වෙනුවෙන් ගතහැකි සියලු ක්රියාමාර්ග ගන්නා ලෙස ජනාධිපතිවරයා නිලධාරීන්ට උපදෙස් දුන්නේය.
මූලාශ්රය – අරුණ
Saru News
