උප්පැන්න සහතික, සාම විනිසුරුවරු විසින් සහතික කිරීම සහ ආණ්ඩුක්‍රම ව්‍යවස්ථාවේ 07 වන උපලේඛනය යටතේ සිදුකළ දිවුරුම සම්බන්ධයෙන් ඇතිවූ ගැටලු මත ප්‍රතික්ෂේප කෙරුණු නාමයෝජනා පත්‍ර යළි භාරගන්නා ලෙස අභියාචනාධිකරණය අද (10) අදාළ තේරීම්භාර නිලධාරීන්ට නියෝග කර ඇත.
ඒ අනුව ප්‍රතික්ෂේප කෙරුණු නාම යෝජනා පත්‍ර 35කට ආසන්න සංඛ්‍යාවක් යළි භාරගන්නා ලෙසත් අධිකරණය විසින් නියම කර තිබේ.
අදාළ නාමයෝජනා පත්‍ර ප්‍රතික්ෂේප කිරීමට එරෙහිව දේශපාලන පක්ෂ හා ස්වාධීන කණ්ඩායම් විසින් ඉදිරිපත් කළ පෙත්සම් විභාග කිරීමෙන් අනතුරුව අභියාචනාධිකරණයේ වැඩබලන සභාපති විනිසුරු මොහොමඩ් ලෆාර් තාහීර් සහ ප්‍රියන්ත ප්‍රනාන්දු යන විනිසුරු මඩුල්ලක් විසින් මෙම නියෝග නිකුත් කර ඇත.
දීර්ඝ නඩු විභාගයකින් අනතුරුව තීන්දුව ප්‍රකාශයට පත් කළ විනිසුරු මඩුල්ල සාමාදාන විනිශ්චකාරවරු විසින් සහතික කළ නාමයෝජනා පත්‍ර සහ දිවුරුම සම්බන්ධයෙන් ඇතිවූ ගැටලු මත නාමයෝජනා ප්‍රතික්ෂේප කිරීමට තේරීම්භාර නිලධාරීන් ගත් තීරණය යුක්ති සහගත බවට ශ්‍රේෂ්ඨාධිකරණය විසින් ඉකුත් 04 වනදා නිකුත් කළ මූලික අයිතිවාසිකම් පෙත්සමක නඩු තීන්දුවක සඳහන් කර ඇතැයි රජයේ නියෝජ්‍ය සොලිසිටර් ජෙනරාල් විසින් පෙන්වා දුන් බව පවසා තිබේ.
ඒ අනුව මෙම කරුණට අදාළව තම අධිකරණය විසින් මීට පෙර ලබාදුන් තීන්දුව යළි සලකා බලන ලෙසත් මෙම කරුණට අදාළව අළුතින් ගොනුකර තිබෙන පෙත්සම් සළකා නොබලන ලෙසත් රජයේ නියෝජ්‍ය සොලිසිටර් ජනරාල් අධිකරණයෙන් ඉල්ලා සිටි බවත් විනිසුරු සිය තීන්දුවෙන් සඳහන් කර ඇත.
එහෙත් තම අධිකරණය විසින් එම තීන්දුව ලබාදෙන අවස්ථාවේදී ශ්‍රේෂ්ඨාධිකරණය විසින් අදාළ නිගමනය කර නොතිබූ බව පෙන්වා දී ඇති අභියාචනාධිකරණයේ සභාපති විනිසුරු ශ්‍රේෂ්ඨධිකරණයේ එම නිගමනය මෙම අවස්ථාවේදී තම අධිකරණයට අදාළ නොවන බවත් පවසා තිබේ.
ඒ අනුව අදාළ නාමයෝජනා පත්‍ර ප්‍රතික්ෂේප කිරීමට තේරීම්භාර නිලධාරීන් ගත් තීරණය බලරහිත කරමින් රිට් ආඥාවක් නිකුත් කරන බවත් විනිසුරු සඳහන් කර ඇත.
ඊට අමතරව එසේ ප්‍රතික්ෂේප කළ නාමයෝජනා පත්‍ර යළි භාරගන්නා ලෙස අදාළ තේරීම්භාර නිලධාරීන් වෙත තවත් රිට් ආඥාවක් නිකුත් කරන බවත් විනිසුරුවරුන් කළ නියෝගයේ වැඩිදුරටත් සඳහන් වී තිබේ.
Saru FM Media
