පළාත් පාලන තැපැල් ඡන්ද දින සංශෝධනයක්

මැතිවරණ කොමිෂන් සභාව නිවේදනයක් නිකුත් කරමින් ප්‍රකාශ කර ඇත්තේ මැයි 06 වැනි දින පැවැත්වීමට නියමිත පළාත් පාලන මැතිවරණය සඳහා තැපැල් ඡන්දය ප්‍රකාශ කිරීමට පැවති දින සංශෝධනය කර දින හතරක් නියම කර ඇති බවයි. මැතිවරණ කොමිෂන් සභාවේ සභාපති ආර්. එම්. ඒ. එල්. රත්නායක මහතාගේ ප්‍රකාශයට අනුව,

2025 අප්‍රේල් මස 24, 25, 28 සහ 29 යන දිනවල මෙම තැපැල් ඡන්ද ප්‍රකාශ කිරීම සිදුකෙරෙනු ඇත.
සියලුම රාජ්‍ය ආයතන, පොලීසිය, ත්‍රිවිධ හමුදාව, පාසල්, සංස්ථා, ව්‍යවස්ථාපිත මණ්ඩල ඇතුළු සියලුම ආයතනවල සේවය කරන තැපැල් ඡන්දදායකයින්ට අප්‍රේල් මස 24, 25, 28 සහ 29 යන දින හතර තුළ තම ඡන්දය ප්‍රකාශ කිරීමට අවස්ථාව සලසා දී ඇත.

මේ අතර, තේරීම්භාර නිලධාරීන් විසින් පළාත් පාලන මැතිවරණයට අදාළ ආයතන 339ක සියලුම ඡන්දහිමියන් වෙත බෙදාහැරීමට නියමිත නිල ඡන්ද දැන්වීම් පත්‍රිකා පෙරදින තැපැල් දෙපාර්තමේන්තුව වෙත භාරදී ඇති බවද වාර්තා වේ.
මැතිවරණ කොමිෂන් සභාව මෙම දින වෙනස්කිරීම පිළිබඳව අදාළ සියලුම ආයතන දැනුවත් කර ඇති අතර, ඡන්දදායකයින්ට මෙම නව දින පිළිවෙල යටතේ අවශ්‍ය පහසුකම් සලසා දෙන ලෙස ඉල්ලා සිටී. මෙම වෙනස්කම සිදුකර ඇත්තේ සියලුම තැපැල් ඡන්දදායකයින්ට තම ප්‍රජාතන්ත්‍රවාදී අයිතිය නිසි ලෙස භාවිතා කිරීමට අවස්ථාව ලබාදීමේ අරමුණිනි.