පවතින තත්වය අනුව කොළඹ මහ නගරසභාවේ නගරාධිපති ධුරය ජාතික ජන බලවේගයේ ව්‍රායි කැලී බල්තසාර් මහත්මියට හිමිවනු ඇති බව ආරංචිමාර්ග පවසයි.
කොළඹ මහ නගරසභාවේ බලය පිහිටුවීම සඳහා ජාතික ජන බලවේගය සහ සමගි ජන බලවේගය අතර තරගයක් නිර්මාණය වී පැවති අතර දෙපාර්ශ්වයම ඊට අදාළව සාකච්ඡා පිට සාකච්ඡා පවත්වමින් සිටි ආකාරයත් පසුගිය දින කිහිපයේ දක්නට ලැබිණි.
කෙසේවෙතත් මේ වනවිට කොළඹ බලය ඇල්ලීමේ හැකියාව විපක්ෂයෙන් ගිලිහී ගොස් ඇති බවයි අභ්‍යන්තර ආරංචිමාර්ග සඳහන් කළේ. මීට ප්‍රධාන හේතුව වී ඇත්තේ කුඩා දේශපාලන පක්ෂ සහ ස්වාධීන කණ්ඩායම් සජබ සමග එක්වීමට එකඟ නොවීම බව සඳහන්. එසේම සජබට තනිව ලැබී ඇත්තේ ආසන 29ක් පමණක් වීම නිසා බහුතරය ලබාගැනීමට විශාල ආසන සංඛ්‍යාවක් පිටින් ලබාගැනීමට සිදුව තිබීම මුල සිටම ගැටලුකාරී වී තිබුණු බවත් සඳහන්.
මේ වනවිට ස්වාධීන කණ්ඩායම් සහ කුඩා පක්ෂ කිහිපයක් ආණ්ඩුවට සහාය දීමට ඉදිරිපත්ව සිටින අතර නගරාධිපති ධුරය සඳහා ඡන්දය විමසන අවස්ථාවට නොපැමිණ එය මගහැර සිටීමට සජබ නගරසභා මන්ත්‍රීවරුන් කිහිපදෙනෙකු ද තීරණය කර ඇති බවත් විශ්වාසකටයුතු ආරංචිමාර්ග ප්‍රකාශ කළේය.
ඒ අනුව පළමු වරට කොළඹ නගරාධිපති ධුරය එක්සත් ජාතික පක්ෂයේ නොවන කාන්තාවකට හිමිවීමට නියමිතව ඇත.
Saru FM Media
