නව යොවුන් දරුවන්ගේ හැසිරීම සමග දෙමව්පිය කාර්යභාරය
ගැහැණු දරුවෙක් වගේම පිරිමි දරුවෙක් නව යොවුන් වයසට පත් වෙන විට ඇති වෙන ශාරිරික ලක්ෂණ ගැන අපේ දෙමව්පියන් ඉතාම හොඳාකාරව දන්නවා. ඒ නිසාම තමන්ගේ දියනිය මල්වර වෙන්නේ කවදාදැයි විමසිල්ලෙන් අම්මාවරු පසු වෙනවා. පිරිමි දරුවන්ගේත් ඇති වෙන ශාරිරික ලක්ෂණ අනුව ”අපේ පුතා දැන් ඉලන්දාරියෙක්..” කියන සතුටක් දෙමව්පියන්ගේ හිතේ ඇති වෙනවා. ඉතින් ශාරිරික ලක්ෂණ අනුව දෙමව්පියන් තෘප්තියට පත් වෙන අතර නව යොවුන් දරුවන්ගේ මානසික හැසිරීම ගැනත් අවබෝධයක් තිබීම ඉතා වැදගත්.
ඉස්සර වගේ දැන් කෝටුවෙන්..වචනයෙන් මට්ටු කරන්න බැහැ
ඇත්ත…පුංචි කාලයේ ඔබේ වචනයට එහෙම නැත්නම් වේවැලට බයෙන් සිටිය දරුවා නව යොවුන් වයසට පත් වුනාම ඒ විදිහට මට්ටු කරන්න අපහසුයි.ඔවුන් දැන් තර්කානුකූලව හිතනවා.
දරුවා දැන් තර්කානුකූලව හිතනවා..
නව යොවුන් වියට පත් ඔබේ දරුවා දැන් තර්කානුකූලව සිතන්න පටන් ගන්නවා. ඒ නිසා හැම දෙයක් ගැනම විමසිලිමත් නිසා ඉස්සර වගේ නිහඩව සිටින්නේ නැහැ. ඒ නිසා ඔබ දරුවාට යම් දෙයක් එපා කියනවාට වඩා ඒ දෙය එපා කියන්නේ ඇයි යන තැනට හේතු කියා දෙන්න.
විද්‍යාත්මකව සිතනවා..
නව යොවුන් දරුවන් පහසුවෙන් මුලා කිරීමත් අපහසුයි. අතීතයේදි ඔබ විවිධ මිථ්‍යාවන්ගෙන් දරුවා මුලා කළත් දැන් ඔවුන් විද්‍යාත්මකව සිතන්න පටන ගන්නවා. ඒ නිසා ඔබේ මිථ්‍යාවන් දැන් ඔවුන්ට ගැලපෙන්නේ නැහැ. අම්මා කියන්නේ බොරු ..ඒක කොහෙමද එහෙම වෙන්නේ කිව්වාම ….
නිර්මානශීලියි..
දරුවා දැන් අලුත් ලෝකයකට විවෘතයි.ඔවුන්ගේ ජීවිතයේ සන්ධිස්ථානයක ආරම්භ සමග නිර්මානශීලිත්වයත් නොදැනීම අවදි වෙනවා.ගැහැණු දරුවන් මැහුම් ගෙතුම්, ඉවුම් පිහුම් වැනි කටයුතු වෙත යොමු වෙන අතරවාරයේදී පිරිමි දරුවන් විවිධ උපාංඟ නිපදවීම, විද්‍යුත් මෙවලම් වෙනුවෙන් වැඩි අවධානයක් දක්වන යුගයක්. ඒ නිසා ඔවුන්ගේ නිර්මානශීලිත්වය අවදි කිරීමට ඉඩ දෙන්න. ඒ නිසාම ඔවුන් අලුත් දේවල් අත්හදා බැලීමට වැඩි උනන්දුවක් දක්වන්න පටන් ගන්නවා.
නව යොවුන් වියේදී ඇති වෙන සාමාජයීය වෙනස්කම්..
නව යොවුන් වියේදී දරුවන් විරුද්ධ ලිංගිකයන් සමග ඇසුරට වැඩි කැමැත්තක් දක්වනවා. ඉස්සර අම්මා ,තාත්තා පමණක් ජීවත්වුන ඔවුන්ගේ ලෝකයේ දැන් ප්‍රේමය, ආදරය වැනි හැඟීම් අවදි වීමට පටන් ගන්නවා. මේ අවදියේදී දරුවා යම් ආදර ගැටුමකින් පරාජය වුනොත් එය දැඩි මානසික පීඩාවක් බවට පත් වීමේ ඉඩ කඩ ගැනත් ඇති අවදානම දෙමව්පියන්ගේ අවධානයට ලක් විය යුතු කරුණක්.
සමවයස් කණ්ඩායම් සමග ඇසුර..
දැන් දරුවා වඩාත් කැමැත්තක් දක්වන්නේ සමවයස් කණ්ඩායම් සමග ඇසුරු කිරීමටයි. නමුත් මේ අවස්ථාවන් සමග දරුවා නොමගට යෑමට ඇති ඉඩ කඩ වැඩියි. මේ සමවයස් කණ්ඩායම් අතරත් විවිධ සමාජවිරෝධී කටයුතුවල නිතර දරුවන් සිටින්නට ඉඩ තිබෙනවා.ඒ නිසා දරුවා ඇසුරු කරන සම යස් කණ්ඩායම ගැනත් දෙමව්පියන්ගේ දැඩි අවධානය ඉතා වැදගත්.
අසාධාරණයට එරෙහි වීම
නව යොවුන් වියේදී දරුවා තමා දැන් ස්වාධීන චරිතයක් ලෙසින් ගොඩ නැගෙන්න පටන් ගන්නවා. වෙනදාට වඩා තර්කානුකූලව සිතන ඔවුන් අසාධාරණය, අයුක්තිය වැනි සංකල්ප ඉදිරියේ නැගී සිටින්න පටන් ගන්නවා. ඒ නිසා පවුල තුළ වුනත් යම් යම් අසාධාරණකම් ගැන දරුවා කතා කිරීම ඔවුන්ගේ යොවුන්වියේ ජවය සමග ඇති වෙන ලක්ෂණයක්.
නායකත්වය..
මේ අවධිය වෙත්ම දරුවා නායකත්වයෙන් කටයුතු කිරීමට සූදානම්. ඒ නිසා පවුල තුළ දරුවාට යම් නායකත්වයක් ලබා දෙන්න. නිවසේ තීන්දු තීරණ ගැනිමේදී ඔවුන්ගේ අදහස් විමසන්න.
පොදු කටයුතු වෙනුවෙන් කැමැත්ත..
නව යොවුන් වියේදී දරුවන් පොදු කටයුතු වෙනුවෙන් කැමැත්තක් දක්වන අවදියක්. පාසලේ සමිති සමාගම්වල පටන් ගමේ පොදු වැඩ කටයුතු දක්වා මේ කැමැත්ත විහිදී යනවා.එවැනි කටයුතු වෙත දරුවන්ගේ මැදිහත් වීම ඔවුන්ගේ අනාගත පෞරෂ තත්වයේ සංවර්ධනයට ඉතාම හිතකර තත්වයක්.ඒ නිසා දරුවෙක් පොදු කටයුත්තක් වෙනුවෙන් සහය දැක්වීමේ යෝජනාවක් පළ කළොත්.
එහෙමනම්…ගැහැනු දරුවෙක් වැඩිවිය පත් වූ තැනදී සතුටට පත් වෙන…පිරිමි දරුවාගේ ගැටවර විය ගැන ආඩම්බර වෙන දෙමව්පියන් ඔවුන්ගේ නව යොවුන් ජීවිතයේ මානසික සහ සමාජයීය වෙනස්කම්ද තේරුම් ගෙන කටයුතු කිරීම ඉතාම වැදගත්.
Saru FM Media
