අපි කාගෙත් සිරුරේ ලේ රතුපාටයි. ඒ ලේ වල සිංහල, දෙමළ, බර්ගර්, මුස්ලිම් විදිහට වෙන් වෙලා නැති වුනත් ජාතිවාදි අරගල වලින් අපි තරම් පීඩා වින්ද පිරිසක් තවත් නැහැ. ඒ නිසාම ජාතිවාදය සනාතනික අරගලයක් විදිහට අපි බද්ධ කර ගෙන සිටීම තරම් මිථ්‍යාවක් තවත් නැහැ. මේ තත්වය පරම්පරාවෙන් පරම්පරාවට අපි ඉදිරියට ගෙන යනවා නම් රටක් විදිහට නැගිටිනන්ට තිබෙන ශක්තිය අපි විහින්ම නැති කර ගන්නවා කිව්වත් වැරැදි නැහැ. අද දවසේ මේ සිදුවීම් දකින් දරුවන් එයින් ලබන අත්දැකීම් ඔවුන් සමගින්ම ඉදිරියට යා හැකි බැවින් අපි පරිස්සම් විය යුත්තේ ඒ ගැනයි. එසේ නම් අපි දරුවන්ට මේ ගැන කියා දිය යුත්තේ මොනවාද…?
මිනිසුන් විදිහට අපි සමානයි කිව්වට බැහැ. ඒ සමානකම දරුවන්ට අපි විසින්ම පෙන්වා දිය යුතුයි. මේ වැරැද්ද බොහෝ විට කරන්නේ අපේම දෙමව්පියන් විසින්. පාසලක, පංතියක වුනත් අහවලාගේ දරුවාගේ…අහවල් පැත්තෙන් ඉස්කෝලෙට එන ළමයි විදිහට වෙන් කරන්න එපා. ඒ වාගේ සිතුවිලි දරුවන්ගේ හිතට ඇතුල් කිරීම ඉතාම වැරදයි. එකට ඉගෙන ගන්නා, එකම පංතියේ, පාසලේ අපි හැම දනාම එකම බව ඔවුන්ට කියා දෙන්න. අපි හැම දෙනාගේ ලේ රතුපාට බව කියා දිය යුත්තේ ඒ පාඩමෙන්ම බව අමතක කරන්න එපා.
මිනිසුන් විදිහට අපි හැම කෙනෙකුටම වටිනාමක් තිබෙන බව දරුවාට කියා දෙන්න. හැම දෙනා එකට ජීවත් වෙනවා මිසක කිසිම තැනකින් වැඩි කොටසක් ගැන අපිට කතා කරන්න බැහැ. ඒ නිසා හැම දෙනාටම ඇත්තේ සමාන අයිතියක් මිස වැඩි වරප්‍රසාද කිසිම කෙනෙකුට නැති බව කියා දෙන්න.
අතීතයේ පටන්ම ඇති වුන හැලහැප්පීම් වෙනුවෙන් පාදක වුන ජාතිවාදය දරුවන් ඉදිරියේ ප්‍රසිද්ධියේ කතා කිරීම අපේම අනුවණකමකි. අපි රට, දැය, සමය වෙනුවෙන් ආදරය කළ යුතු බව සැබෑ වුනත් එක් එක් ජාතීන් ගැන හෙලා තලා කථා නොකල යුතුය. මේ පුංචි රටේ අපි හැම කෙනෙක්ම ජීවත්විය යුතු බව දරුවන්ටත් කියා දෙන්න. ගහට ගහක් මොරටුවේදී හමු වෙනවාය යන කියමන සේ අපිට කිසිම කෙනෙක් ප්‍රතික්ෂෙප කිරීමට නොහැකියි. මිනිසුන් වහයෙන් අපට අවශ්‍ය වන්නේ මිනිසුන්ය. ඒ නිසා දෙමළ, මුස්ලිම්,බර්ගර් වැනි ජාතීවාදී ලේබලය ගැන දරුවන් ඉදිරියේ කතා නොකරන්න.
අද වඩාත් අවශ්‍යතාවයක් වී ඇත්තේ සහජීවනයයි. ඒ වෙනුවෙන් විවිධ සංස්කෘතින් ගැන ඔවුන්ට කියා දෙන්න. හැම ආගමික නායකයෙකුගේ ඉගැන්වීම සාමය නම් ගැටෙන්නේ ඇයිද යන තැනට ඔවුන්ගේ මානසිකත්වය ගොඩ නැගීම ඉතාම වැදගත් වේ.
අද සමාජජාල සමග ඔබේ දරුවාද සම්බන්ධ වී ඇත.එහි කිසිදු වරදක් නැත. තොරතුරු සන්නිවේදනයේදී එබේ දරුවාට පමණක් හුදෙකලා වීමට නොහැකිය. එහෙත් මෙහිදී යා යුතු මග නොමග තෝරා ගැනීම ගැන කියා දෙන්න. අනවශ්‍ය ලෙසින් සමාජය උණුසුම් කරන පුවත් කියැවීමෙන් පසුව එය බෙදා හදා ගත යුතුද නැත්ද ගැන බුද්ධිමත් වීම මෙන්ම ස්වයංවිනයක් මත කටයුතු කිරීමට උපදෙස් දෙන්න. බෙදාහැරීමට පෙරාතුව දෙවතාවක් හිතන්නට උපදෙස් දෙන්න. කපුටු තට්ටක් වමනය වූ තැන කපුටන් හත් දෙනෙක් දක්වා එය වර්ධනය වූවා සේ මෙම තොරතුරු වල සත්‍යතාවය නොදැන ඒවා බෙදා හැරීමෙන් වලකින සේ දරුවා මෙහෙයවන්න. පෝස්ට් වෙනුවෙන් මනාප හෙවත් ලයික් සටහන් කිරීම, බෙදා ගැනීම වැනි කටයුතු බුද්ධියෙන් මෙහෙයවා කිරීම ඉතාම වැදගත් බව කියා දෙන්න. දෙමව්පියන් විදිහට ඔබ විසින් දරුවන්ට ලබා දෙන මේ මග පෙන්වීම ඉතාම යහපත් සමාජ මෙහෙවරක් වෙනු ඇත.
බොහෝ දරුවන්ගේ ආවේගශීලිත්වය වගේම අනුකරණය බොහෝ ආරෝවියවුල් වෙනුවෙන් හේතු වෙනු ඇත. ඇතැම් අවස්තාවලදී ජාතිවාදයේදී අප ආවේග ඇති කර ගන්නේ අපිට කිසිදු දිනක වරදක් නොකළ පුද්ගලයන් වෙනුවෙන්ය. මේ ආවේග නිසා ඇති වෙන ප්‍රතිඵල ඉතා දරුණුය. ඒ නිසා නිතරම දරුවන්ගේ ආවේග පාලනයවන සේ ඔවුන් බාල කාලයේදී පටන් හැඩගැසීම ඉතාමත් වැදගත්.
Saru FM Media
