හෙට (06) පැවැත්වීමට නියමිත පළාත් පාලන ඡන්ද විමසීමට අදාළ ඡන්ද පෙට්ටි, මධ්‍යස්ථාන වෙත ප්‍රවාහනය මේ වනවිට ආරම්භ කර තිබෙනවා.
ඒ, අනුව අද (05) පස්වරුව වනවිට සියලු ඡන්ද මධ්‍යස්ථාන වෙත ඡන්ද පෙට්ටි ප්‍රවාහනය කර අවසන් කරන බවයි මැතිවරණ කොමිෂන් සභාව සඳහන් කළේ.
මේ අතර පළාත් පාලන ඡන්ද විමසීම හේතුවෙන් අද (05) සහ හෙට (06) යන දින දෙක තුළ සියලුම පාසල්වලට නිවාඩු ලබා දී තිබෙනවා.
ඒ, අනුව පාසල් යළි විවෘත කිරීම ලබන 07 වනදා සිදුකරන බවයි අධ්‍යාපන අමාත්‍යංශය සඳහන් කළේ.
පළාත් පාලන ආයතන 339ක් සඳහා සභිකයින් 8,287 දෙනෙකු තෝරා පත්කර ගැනීමේ ඡන්ද විමසීම හෙට (06) උදෑසන 7.00 ට ආරම්භ වනවා.
දිවයින පුරා ස්ථාපිත ඡන්ද මධ්‍යස්ථාන 13,759ක දී පස්වරු 4.00 දක්වා ඡන්ද විමසීම පැවැත් වෙනවා.
මෙවර පළාත් පාලන ආයතන ඡන්ද විමසීම වෙනුවෙන් ඡන්ද දායකයින් එක් කෝටි හැත්තෑ එක් ලක්ෂ පනස් හයදහස් තුන්සීය තිස් අටදෙනෙකු සුදුසුකම් ලබා සිටිනවා.
පිළිගත් දේශපාලන පක්ෂ 49ක් සහ ස්වාධීන කණ්ඩායම් 257ක් නියෝජනය කරමින් මෙවර පළාත් පාලන ඡන්ද විමසීමට ඉදිරිපත් වී සිටින අපේක්ෂකයින් සංඛ්‍යාව 75,589ක්.
.
Saru FM Media
