එළැඹෙන පළාත් පාලන මැතිවරණයට අදාළ ජන්ද දායකයින් වෙත ලබාදිය යුතු ඡන්ද පත්‍රිකා 28ක් ඡන්ද පත්‍රිකා හිමි අයවළුන්ට ලබා නොදී වෙළඳසැල් හිමියෙකු හරහා බෙදාදීමට ලබා දුන් තැපැල් බෙදන්නෙකු හා ඡන්ද පත්‍රිකා බෙදාදීමට ළඟ තබාගෙන සිටි වෙළඳසැල් හිමියෙකු ඊයේ (29) අත්අඩංගුවට ගත් බව වවුනියාව පොලිසිය පවසනවා.
දසත ප්‍රාදේශීය වාර්තාකරු පැවසුවේ, වවුනියාව, පූන්තෝට්ටම් ප්‍රදේශයේ පදිංචිකරුවන් වෙත බෙදාදීමට තිබූ ඡන්ද පත්‍රිකා 28ක් ප්‍රදේශයේ තැපැල් බෙදීම සිදු කරන තැපැල් බෙදුම්කරු විසින් අදාළ හිමිකම්පත් හිමිකරුවන් වෙත ලබානොදී ප්‍රදේශයේ වෙළඳසැල් හිමිකරුවෙකු වෙත භාර දී අදාළ පුද්ගලයින් පැමිණියහොත් ඡන්ද පත්‍රිකා ලබාදෙන ලෙසට දන්වා ගොස් ඇති බවයි.
සිදුවීම සම්බන්ධයෙන් වවුනියාව සහකාර මැතිවරණ කොමසාරිස් කාර්යාලය වෙත ලද තොරතුරක් මත වවුනියාව සහකාර මැතිවරණ කොමසාරිස් කාර්යාල නිලධාරීන් පොලිස් නිලධාරීන් සමඟ ගොස් සැකකාර තැපැල් බෙදුම්කරු හා ඡන්ද පත්‍රිකා භාරයේ තබාගෙන සිටි වෙළෙඳ ව්‍යාපාරිකයෙකු අත්අඩංගුවට ගෙන තිබෙනවා.
අත්අඩංගුවට ගත් තැපැල් බෙදුම්කරු හා වෙළඳසැල් හිමියා වවුනියාව මහේස්ත්‍රාත් අධිකරණයට ඉදිරිපත් කොට ඇති අතර,සිද්ධිය සම්බන්ධයෙන් වවුනියාව පොලිසිය වැඩිදුර පරීක්ෂණ මෙහෙයවනවා.
Saru FM Media
