රුපියල් කෝටි විසිතුනක් වටිනා ‘කුෂ්’ මත්ද්‍රව්‍ය තොගයක් රැගෙන කටුනායක ගුවන් තොටුපොළ වෙත පැමිණි අමෙරිකානු ජාතිකයෙකු, ගුවන් තොටුපොළ පැමිණීමේ පර්යන්තයේ, ව්‍යාපාරිකයන් සඳහා වූ රක්ත මාවත (Red Channel) ඔස්සේ ගුවන් තොටුපොළෙන් පිටතට යාමට තැත් කරමින් සිටියදී ඊයේ (15) පෙරවරුවේ රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අත්අඩංගුවට ගනු ලැබුවා.
දසත ගුවන්තොටුපොළ වාර්තාකරු පැවසුවේ සැකකරු 31 හැවිරිදි ඉඩම් වෙළෙඳාමේ නිරත සමාගමක නිලධාරියෙකු බවයි.
ඊයේ පෙරවරු 10.15 ට තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් සැකකරු කටුනායක ගුවන් තොටුපොළ වෙත පැමිණ තිබූ බවයි වාර්තා වන්නේ.
ඔහු විසින් රැගෙන ආ ගමන් මල්ල තුළ කිලෝග්‍රෑම් 01 බැගින් වූ පැකට් 23ක් ලෙස සකස් කර මෙම කුෂ් මත්ද්‍රව්‍ය කිලෝග්‍රෑම් 23ක ප්‍රමාණය සඟවා තිබූ බව ද සඳහන්.
තායිලන්තය තුළ මේ වනවිට ‘කුෂ් වැනි මත්ද්‍රව්‍ය නීත්‍යනුකූලගත කර ඇති නිසා එවැනි මත්ද්‍රව්‍ය සුලබ ව එරට විවෘත වෙළෙඳපොළ තුළින් සොයා ගත හැකි බැවින් මේ වන විට වැඩි වශයෙන් ශ්‍රී ලංකාවට කුෂ්, හෂීස් සහ කොකේන් ගෙන ඒමේ ප්‍රවණතාවක් වාර්තා වන බවයි රේගු මාධ්‍ය ප්‍රකාශක සීවලී අරුක්ගොඩ මහතා සඳහන් කළේ.
Saru FM Media
