අද (මැයි 13) අළුයම 4.30ට පමණ කොට්ටාව පොලිස් ස්ථානයට ලැබුණු 119 හදිසි ඇමතුමකට අනුව, රුක්මලේ පාර, විහාර මාවත, අංක 764 යන ලිපිනයෙහි පිහිටි නිවසක ගින්නක් ඇතිවී ඇති බවට වාර්තා විය. පොලිසිය සිද්ධිය සම්බන්ධයෙන් දැනුවත් වීමෙන් අනතුරුව වහාම සිද්ධිය ස්ථානයට පැමිණ පරීක්ෂණ ආරම්භ කළ අතර, එහිදී නිවසේ කාමරයක් ගිනිගෙන තිබූ බවත්, එම ගින්නෙන් අවුරුදු 19ක් වයසැති ප්‍රදම්මණී ටුරංජා නම් තරුණියක් මිය ගොස් සිටි බවත් සොයා ගන්නා ලදී.
පොලිසිය සිදු කළ මූලික විමර්ශනවලදී අනාවරණය වූයේ, මෙම තරුණිය ඇතුළු පවුලේ සාමාජිකයින් සිව් දෙනෙකු මාස අටක පමණ කාලයක සිට මෙම නිවසේ කුලී පදනම මත පදිංචිව සිටි බවයි. ඊයේ (මැයි 12) රාත්‍රියේ මියගිය තරුණියගේ මව සහ සහෝදරයන් දෙදෙනා වෙසක් උත්සවය නැරඹීම සඳහා නිවසින් පිටත්ව ගොස් ඇති අතර, තරුණිය පමණක් නිවසේ රැඳී සිට ඇත. මෙම තරුණිය නිවසේ නිදා සිටි අවස්ථාවේදී මෙම ගින්න ඇතිවී ඇති බවට පොලිසිය සැක කරයි.
කෝට්ටේ ශ්‍රී ජයවර්ධනපුර ගිනි නිවීමේ ඒකකයේ නිලධාරීන් සහ ප්‍රදේශවාසීන්ගේ මැදිහත්වීමෙන් ගින්න නිවා දැමීමට පියවර ගෙන ඇති නමුත්, ඒ වන විටත් තරුණිය ජීවිතක්ෂයට පත්ව සිටි බව වාර්තා වේ. ගින්නෙන් තරුණියගේ සිරුර මුළුමනින්ම පිළිස්සී ඇති අතර, නිවසේ දේපළවලට සහ වහලයට ද සැලකිය යුතු හානි සිදුවී ඇත.
මෙම ගින්නට හේතුව තවමත් අනාවරණය වී නොමැති අතර, තරුණියගේ මරණය සැක සහිත බව පොලිසිය පවසයි. දැනට නුගේගොඩ අපරාධ ස්ථානයේ නිලධාරීන් සිද්ධිය සම්බන්ධයෙන් වැඩිදුර විමර්ශන පවත්වමින් සිටිති.
මියගිය තරුණිය පුදම්මිනි ටුරන්ජා නම් 19 හැවිරිදි අවිවාහක තරුණියක් බවට හඳුනාගෙන ඇත. පොලිසිය දැනට සිද්ධිය සම්බන්ධයෙන් සාක්ෂි රැස්කරමින් සිටින අතර, ගින්න ඇතිවීමට හේතු සහ වෙනත් සැක සහිත කරුණු පිළිබඳව විමර්ශනය කරමින් සිටී.
සිද්ධිය වඩාත් අභිරහස් වන්නේ තරුණිය එම අවස්ථාවේ නිවසේ තනිවම සිටීමත්, ගින්න ඇතිවීමට හේතුව පැහැදිලි නොවීමත් නිසා බව පොලිසිය පෙන්වා දෙයි. පොලිසිය දැනට ගින්න ස්වභාවිකව ඇතිවූවක්ද, අනතුරක් ලෙස සිදුවූවක්ද, නැතහොත් වෙනත් අපරාධමය ක්‍රියාවක ප්‍රතිඵලයක්ද යන්න පිළිබඳව විමර්ශනය කරමින් සිටී.
මෙම සිද්ධිය සම්බන්ධයෙන් තවදුරටත් තොරතුරු අනාවරණය වන පරිදි පරීක්ෂණ පැවැත්වෙන බව කොට්ටාව පොලිසිය පවසයි.
Saru FM Media
