ඇල්පිටිය – අම්බලන්ගොඩ මාර්ගයේ කුරුඳුගහ නගරයේදී අද (15) අලුයම සිදුවූ රිය අනතුරකින් වයස අවුරුදු 6ක දැරියක් ජීවිතක්ෂයට පත්ව ඇත.
අම්බලන්ගොඩ සිට ඇල්පිටිය දෙසට ගමන් කරමින් තිබූ ත්‍රීරෝද රථයක් ප්‍රතිවිරුද්ධ දිශාවෙන් පැමිණි වෑන් රථයක ගැටීම හේතුවෙන් මෙම අවාසනාවන්ත අනතුර සිදුව ඇති බව පොලිස් වාර්තා සඳහන් කරයි.
අනතුරට ලක්වූ ත්‍රීරෝද රථයේ ගමන් කළ ත්‍රීරෝද රථ රියදුරු, පිටුපස අසුනේ සිටි පිරිමි පුද්ගලයෙකු, කාන්තාවන් දෙදෙනෙකු සහ ගැහැණු දරුවන් තිදෙනෙකු බරපතල තුවාල ලබා ඇත. මෙම පිරිස හදිසියේ ඇල්පිටිය රෝහල වෙත රැගෙන ගොස් ප්‍රතිකාර ලබාදීමට කටයුතු කර ඇති අතර, ප්‍රතිකාර ලබමින් සිටියදී කුරුඳුවත්ත, පිටිගල ප්‍රදේශයේ පදිංචි හය හැවිරිදි දැරිය ජීවිතක්ෂයට පත්ව ඇත.
සෙසු තුවාලකරුවන් දැනට ඇල්පිටිය රෝහලේ නේවාසිකව ප්‍රතිකාර ලබමින් සිටින අතර, ඔවුන්ගේ තත්ත්වය පිළිබඳ වැඩිදුර තොරතුරු වාර්තා වී නැත.
අනතුරට අදාළ වෑන් රථයේ රියදුරු පොලිස් අත්අඩංගුවට ගෙන ඇති අතර, ඇල්පිටිය පොලීසිය සිද්ධිය සම්බන්ධයෙන් වැඩිදුර විමර්ශන සිදු කරමින් සිටී.
ප්‍රදේශවාසීන් සඳහන් කරන පරිදි මෙම මාර්ගයේ නිතර රිය අනතුරු සිදුවන අතර, මාර්ග ආරක්ෂාව පිළිබඳ වැඩි අවධානයක් යොමු කරන ලෙස ඔවුන් බලධාරීන්ගෙන් ඉල්ලා සිටිති.
Saru FM Media
