ඔස්ට්‍රේලියානු යොවුන් ක්‍රිකට් ක්‍රීඩක බෙන් ඔස්ටින් මෙල්බර්න්හි පැවති පුහුණු සැසියකදී පන්දුවක් වැදීමෙන් ජීවිතක්ෂයට පත්ව තිබේ.
17 හැවිරිදි බෙන් ඔස්ටින් අඟහරුවාදා ෆර්න්ට්‍රී ගලීහි ක්‍රිකට් නෙට් පුහුණුවක නිරත වෙමින් සිටියදී ඔහුගේ හිසට හෝ ගෙළ ප්‍රදේශයට පන්දුවක් වැදී තිබිණි. එම අවස්ථාවේ ඔහු හිස්වැස්මක් පැළඳ සිටි බවට විශ්වාස කෙරේ. ඔස්ට්‍රේලියාවේ වේලාවෙන් පස්වරු 5:00ට සුළු වේලාවකට පෙර හදිසි සේවකයන් එම ස්ථානයට කැඳවනු ලැබූ අතර, බරපතළ තත්ත්වයෙන් සිටි එම දරුවා මොනෑෂ් ළමා රෝහලට ඇතුළත් කරන ලදී. ඔහුට ජීවිතාරක්ෂක ආධාරක සවි කළ නමුත් බ්‍රහස්පතින්දා මිය ගියේ ය.
ෆර්න්ට්‍රී ගලී ක්‍රිකට් සමාජය පැවසුවේ, තම ක්‍රීඩකයෙකුගේ “ඛේදජනක සමුගැනීමෙන්” ඔවුන් “අතිශයින් ම කම්පාවට පත් වූ” බවත්, එම යෞවනයාගේ මරණය “අපගේ ක්‍රිකට් ප්‍රජාවේ සැමට දැනෙනු ඇති” බවත් ය. 2014 දී ෂෙෆීල්ඩ් පළිහ තරගාවලියේදී පන්දුවක් ගෙළෙහි වැදීමෙන් ඔස්ට්‍රේලියානු ක්‍රිකට් ක්‍රීඩක ෆිලිප් හියුස් මිය ගොස් දශකයකට පමණ පසු මෙම සිදුවීම සිදුවිය.
චතුර පමුණුව
Saru FM Media
