වර්තමාන ලෝකයේ කාර්යබහුල වීම සාමාන්ය ජීවන රටාවක් බවට පත්ව තියෙනවා. රැකියාව, අධ්යයන කටයුතු, වගකීම් සහ විවිධාකාර වූ අභියෝග අතර, බොහෝ දෙනා තමා ගේ ස්වයං රැකවරණය පිළිබඳව පවා අමතක කරමින් එක් කාර්යයක් අවසානයේදී තවත් කාර්යයක් වෙත යොමුවීමට පුරුදුව සිටිනවා. විශේෂයෙන්ම තරුණියන් විසින් නොසලකා හරින ස්වයං රැකවරණය හෙවත් Self care පිළිබඳව ඔබට කියන්නට අපි හිතුවා.
ඇත්ත වශයෙන්ම ස්වයං රැකවරණය යනු ඔබට කාලය ඇති විට ඔබ කළ යුතු සුඛෝපභෝගී කාර්යයක් නොවේ. එය ඔබ ඔබේ දෛනික ජීවිතයට මෘදු ලෙස ඇතුළත් කර ගත යුතු අනිවාර්ය අංගයකි. ඔබේ කාර්යබහුල දිනවල පවා ඔබ අවධානය යොමු කළ යුතු ස්වයං රැකවරණය මගින් ඔබේ චර්යාවෙහි, ජීවන රටාවෙහි සහ ඔබේ සිතුම් පැතුම් වල පවා විශාල වෙනසක් ඇති කළ හැකියි.
සන්සුන් මනසකින් ඔබේ දවස ආරම්භ කරන්න
ස්වයං රැකවරණය සඳහා ඔබට දිගු හෝ පරිපූර්ණ උදෑසන චර්යාවක් අවශ්ය වන්නේ නැහැ . අවදි වූ පසු නිහඬ මිනිත්තු කිහිපයක් ලබා ගැනීම මගින් ඔබේ සම්පූර්ණ දිනයම ඔබට වෙනස් කර ගත හැකියි. උදෑසන අවදි වූ වහාම ඔබේ දුරකථනය පරීක්ෂා කිරීම හෝ ඇඳෙන් නැගිටීම වෙනුවට, නිහඬව වාඩි වී සිටීමට, ඔබේ දිනය පිළිබඳව මෙනෙහි කිරීමට හෝ ගැඹුරු හුස්මක් ගැනීම කෙරෙහි අවධානය යොමු කරන්න.
මෙම කුඩා මොහොත ඔබේ මනස සෙමින් හා සාමකාමීව අවදි කිරීමට උපකාරී වන අතර, ආතතිය අඩු කර එළඹෙන දිනය සඳහා සන්සුන් භාවය සකසා ගන්නවා.
ඔබේ ශරීරය සජලනය කර පෝෂණය කරන්න
පහසුම, වඩා හොඳ ප්රතිඵල ලබා දෙන ස්වයං රැකවරණ පුරුදු වලින් එකක් ලෙස උදෑසන අවදි වූ පසු වතුර වීදුරුවක් පානය කිරීම සැලකෙනවා. පැය ගණනක නින්දෙන් පසු, ඔබේ ශරීරයට නැවත නිසි ආකාරයෙන් ක්රියා කිරීම සඳහා සජලනය අවශ්ය වනවා.එම නිසා වතුර වීදුරුවකින් ඔබේ දවස ආරම්භ කිරීමෙන් ඔබේ ශක්තිය, අවධානය සහ සමස්ත සෞඛ්යය වැඩි දියුණු කර ගත හැකියි.
ඒ සමඟම, ඔබ කොතරම් කාර්ය බහුල වුවත් ඔබේ ප්රධාන ආහාර වේල් මඟ හැරීමට උත්සාහ නොකරන්න. ඔබ කාර්යබහුල වුවද, පලතුරු හෝ ගෙදර පිසූ ආහාර වැනි සරල හා පෝෂ්යදායී ආහාර තෝරා ගැනීමෙන් ඔබට ක්රියාශීලීව සහ චිත්තවේගීය වශයෙන් සමබරව සිටීමට උපකාරී වනවා. මන්ද, ඔබ විසින් ඔබේ ශරීරය රැකබලා ගැනීම ස්වයං රැකවරණයේ පදනමයි.
වරදකාරී හැඟීමක් නොමැතිව විවේක ගන්න
බොහෝ විට බොහෝ දෙනාට හැඟෙන්නේ ඔවුන් සැමවිටම ඵලදායී විය යුතු බවයි. නමුත් විවේකයකින් තොරව නිරන්තරයෙන් වැඩ කිරීම මානසික පීඩනයට ලක් වීම සහ ආතතියට හේතු විය හැක.
දිවා කාලයේදී මිනිත්තු පහේ සිට දහය දක්වා කෙටි විවේක ගැනීම මගින් කලබලකාරී ඔබේ මනස නැවත නැවුම් කර ගැනීමට හැකියාව ලැබෙනවා. මිනිත්තු කිහිපයක් නිහඬව වාඩි වී සිටීම, සංගීතයට සවන් දීම , නැතහොත් මොහොතකට ඔබේ ඇස් වසා සිටීම පවා කෙටි විවේකයේදී ඔබට කළ හැකියි. කිසිවිටෙකත් මෙම විවේක කාලය නාස්තියක් නොවන අතර ඒවා ඇත්ත වශයෙන්ම ඔබට වඩා හොඳ අවධානයක් සහ ශක්තියක් සහිතව ඔබේ කාර්යයන් වෙත ආපසු යාමට උපකාරී වනවා.
ඩිජිටල් උපකරණ භාවිතය අවම කරගන්න
උදෑසන කාලයේදී ඔබ සමාජ මාධ්යවල, ඔබේ දුරකථනයේ වැඩිපුර කාලයක් ගත කිරීම මගින් ඔබට ආතතිය, ඍනාත්මක කාරණා මනසට ඇතුළු වීම සහ මානසික වෙහෙස වැඩි වීම විය හැකිය.
ඔබේ දවස තුලදී කුඩා වේලාවක් දුරකථනය සහ සමාජ මාධ්ය රහිත අවස්ථාවන් කිහිපයක් නිර්මාණය කර ගැනීමට උත්සාහ කරන්න. නිදසුනක් වශයෙන්, අවදි වූ වහාම හෝ නින්දට යාමට පෙර ඔබේ දුරකථනය පරීක්ෂා කිරීමෙන් වළකින්න. මෙම සරල පුරුද්ද ඔබේ මනසට විවේක ගැනීමට ඉඩක් ලබා දෙන අතර ඔබේ මානසික සහනය ආරක්ෂා කරනවා.
ඔබේ දින චර්යාව සරලව තබා ගන්න
ස්වයං රැකවරණය යනු දිගු පියවර ලැයිස්තුවක් අනුගමනය කිරීම නොවේ. එය ඔබේ මුහුණ සේදීම, ඔබේ සම සඳහා සත්කාර කිරීම හෝ ඔබේ හිසකෙස් නිසි ලෙස පීරීම වැනි සරල දේවල් විය හැකිය.
ඉලක්ක සම්පූර්ණ කිරීම පරිපූර්ණත්වය නොවන අතර එය අනුකූලතාවයි. ඔබ සෑම දිනකම කුඩා ආකාරවලින් ඔබ ගැන සැලකිලිමත් වන විට, එය සැනසිල්ල සහ ආත්ම ගෞරවය පිළිබඳ හැඟීමක් ඔබ තුළම ගොඩ නගනවා.
ඔබේ ශරීරය මෘදු ලෙස චලනය කරන්න
ප්රබෝධමත් බවක් දැනීම සඳහා ඔබට දැඩි ව්යායාම අවශ්ය වන්නේ නැහැ . කෙටි දුරක් දිවීම ,ඇවිදීම හෝ සැහැල්ලු ව්යායාම වැනි මෘදු චලනයන් වලට ඔබේ මනෝභාවය වැඩි දියුණු කර ආතතිය අඩු කිරීමේ හැකියාව තියෙනවා.කෙටි හෝ ව්යායාමයක් ඔබේ දින චර්යාවට එකතු කරගැනීම මගින් ඔබට සෞඛ්යමය අතින් ද බොහෝ ප්රතිලාභ ලබා ගත හැකි වනවා.
ඔබ වෙනුවෙන්ම එක් දෙයක් කරන්න
ඔබේ දවස කොතරම් කාර්යබහුල වුවත්,අවම වශයෙන් ඔබට ප්රීතිය ගෙන දෙන එක් දෙයක් හෝ සිදු කිරීමට උත්සාහ කරන්න. එය ඔබේ ප්රියතම කෝපි පානය කිරීම, ඔබේ දිනපොතේ පේළි කිහිපයක් ලිවීම හෝ ඔබ ප්රිය කරන චිත්රපටයක් නැරඹීම විය හැකිය.
මෙම කුඩා ක්රියාවන් ඔබට මතක් කර දෙන්නේ ඔබේ කාර්යබහුල දිනවල පවා ඔබට ඔබේ සතුට වැදගත් බවයි.
ඔබේ ශක්තිය ආරක්ෂා කරන්න
ස්වයං රැකවරණය යනු ඔබ කරන දේ ගැන පමණක් නොවන විතර එය ඔබ වළක්වා ගන්නා දේවල් පිළිබඳවද වනවා. සෑම තත්වයක්ම ඔබේ කාලය හෝ ශක්තිය ලැබිය යුතු ඒවා නොවේ.
” නැහැ” සහ ” එපා ” කියන්නට ඉගෙන ගැනීම, අනවශ්ය සහ ගැටලුකාරී තත්ත්වයන් වළක්වා ගැනීම, නිෂේධාත්මක බවින් ඉවත් වීම ඔබේ මානසික යහපැවැත්ම ආරක්ෂා කර ගැනීමට ඔබට හැකිවන බලවත් ක්රමයි. එයින් අදහස් වන්නේ ඔබේ සාමය සැමවිටම ප්රමුඛතාවයක් විය යුතු බවයි.
ඔබේ දවස මෘදු ලෙස අවසන් කරන්න
ඔබේ උදෑසන මෙන්, ඔබේ රාත්රී චර්යාව ද වැදගත් වනවා. ආතතියෙන් හෝ නිමක් නැති පීඩාවන්ගෙන් ඔබේ දවස අවසන් කරනවා වෙනුවට, මදක් නැවතීමට සහ මන්දගාමී වීමට උත්සාහ කරන්න.
ඔබේ අවකාශයේ ආලෝකය අඩු කරන්න, උණුසුම් දෙයක් පානය කරන්න , නැතහොත් ඔබේ දවස ගැන මෙනෙහි කරන්න. “අද මම ඇති තරම් වැඩකළා” , ” අද මගේ දවස සම්පූර්ණයි ” වැනි සරල සිතුවිල්ලක් පවා සැනසීමක් ගෙන දෙන අතර එවැනි සිතුවිලි නින්දට පෙර ඔබට විවේක ගැනීමට උපකාරී වනවා.
ස්වයං රැකවරණය යනු ඔබ අමතර කාලයක් වැය කිරීම නොවේ.එය කුඩා, අර්ථවත් ආකාර වලින් ඔබ වෙනුවෙන් කාලය වෙන් කිරීමයි. ඒ සඳහා ඔබට පරිපූර්ණ චර්යාවන් හෝ මිල අධික නිෂ්පාදන අවශ්ය වන්නේ නැහැ. ඔබට අවශ්ය වන්නේ අනුකූලතාව, කරුණාව සහ ඔබ ගැන සැලකිලිමත් වීමට ඇති කැමැත්තයි.
ඔබේ කාර්යබහුල දිනවල පවා, ඔබට සාමකාමී නිහඬ අවස්ථා කිහිපයක් ලැබිය යුතුය.
Saru News
