දරුවන් පොත් පත් කියවීමට දැන් වැඩි කැමැත්තක් නැති බව හැම දෙමව්පියෙක්ම කථා බහ කරන පොදු මාතෘකාවක්. ඒ වගේම දැන් මොන තරම් පුස්තකාල දියුණු යුගයක්ද…? ඒත් අපේ දරුවන් පුස්තකාලයකින්වත් පොතක් , පත්තරයක් කියවන සිරිතක් නැති හැටි යැයි කිව්වත් අලුත්ම සොයා ගැනීමක් මගින් පෙන්වා දෙන කරුණු ගැන දැන ගත්තොත් දරුවන් වෙනුවෙන් පුංචි පුස්තකාලයක් නිවසේ ගොඩ නගා ගැනීම මොන තරම් වැදගත් දැයි හිතේවි.
නෙවාඩා විශ්ව විද්‍යාලයේ පර්යේෂකයින් පිරිසක් විසින් සිදු කරන ලද මෙම අධ්‍යනයට පාදක වූයේ දරුවෙක් වෙනුවෙන් නිවසක් තුළ කියවන සමාජයක් තිබීම මොන තරම් වැදගත්ද යනන්යි. ඒ සදහා ඔවුන් වසර කීපයක් තුළ දරුවන් 1, 60 , 000 ක් සම්බන්ධ කර ගත් නියැදියක් තෝරා ගත්තා. එම අධ්‍යනය අවසානයේ මේ පර්යේෂකයන්ට පෙනී ගියේ නිවස තුළ කුඩා හෝ පුස්තකාලයක් තිබෙන පරිසරයක ජීවත්වෙන දරුවන් එවන් කියවන පරිසරයක් නොමැති සමාජයක දරුවන්ට වඩා අධ්‍යන කටයුතු වලදී 19 % ක් වාසියක් ලබා ඇති බවයි.
සමහර විට ඉහත ප්‍රශ්නය ඔබේ හිතටත් නැගේවි. ඒත් කලබල වෙන්න එපා. පුස්තකාලයක් එක දවසකින් ගොඩ නැගෙන්නේ නැහැ.ඒ නිසා ඔබට හැකි විදිහකට දරුවන් වෙනුවෙන් නිවසේ කුඩා පුස්තකාලයක් ආරම්භ කිරීමට උනන්දු වෙන්න.
දරුවෙක් මහජන පුස්තකාලයකින් හෝ පාසල් පුස්තකාලයකින් කියවීමේ හුරුව ගොඩ නගා ගැනීමට පෙරාතුව නිවසේ තිබෙන පොත් පත් දැකීමෙන් ඔවුන්ට ඒ වෙනුවෙන් මුල්ම හැගීමක් ඇති වීමට විශාල ලෙසින් පිටුබල වෙන හේතුවක්. ආගන්තුක පරිසරයට වඩා නිවසේ තිබෙන මේ සම්පත් මගින් මූලික පසුබිම සකසා ගත් විට එතැනින් ඔබබ්ට දරුවාට ඇති වෙන්නේ කියවීමේ පිපාසයක්. එය ඉතාම හොඳ පුරුද්දක්. පිපාසය සංසිදවා ගැනීමට දරුවන් විකල්ප විමසන විදී පුස්තකාලයත් ඔවුන් වඩාත් ප්‍රියකරන තෝතැන්නක් බවට පත් වේවි. ඒත් මේ වෙනුවෙන් මුල්ම අත්පොත් තබන්නේ නිවසේ තිබෙන පුංචිම පුංචි පොත් අල්ලාරිය හෙවත් දරුවාගේ පුස්තකාලයෙන් වෙන්න පුලුවනි.
සාමාන්‍යයෙන් පාසලේ අවශ්‍යතාවයන් වෙනුවෙන් හෝ පොත් පත් මිළට ගන්නා විට දරුවාගේ කියවීමට අදාල පොතක් පතක් මිළට ගැනීමටත් උනන්දු වෙන්න. ඒ වගේම සාහිත්‍ය මාසයේ වැනි කියවිම ප්‍රවර්ධන කරන කාලසීමාවන්හිදී දරුවාගේ පුස්තකාලයටත් පොතක් පතක් අරගෙන දීමට උනන්දු වීම ඉතාම වැදගත්. ඒ විතරක් නොවෙයි, දරුවාගේ උපන්දිනය එහෙමත් නැත්නම් ඔවුන්ගේ ජයග්‍රහනයක් වැනි විශේෂ අවස්තාවකදීත් සිහිවටනයක් විදිහට පොත් පත් අරගෙන දීම මගින් නිවසේ ඇති පුස්තකාලයට විශේෂ අනුග්‍රහයක් ලබා දීමට පුලුවනි.
දරුවන් පොත් පත් කියවන විට ඇතැම් පොත් පත් වෙනුවෙන් විශේෂ කැමැත්තක් දක්වනවා.අපි වුනත් බාල කාලයේදී ”උඩගිය බබා “, ”කුඩහොරා ” සහ ” හත්පෙතිමල ” වගේ පොත් ඉතා කැමැත්තෙන් කියවන ලද අතර අදටත් ඒ පොත් ගැන මතකය අමතක වෙන්නේ නැහැ. ඒ නිසා පුතාගේ අම්මා, තාත්තා පුංචි කාලේ කියවන ලද පොත් පත් විදිහට ඔබට දරුවාගේ පුස්තකාලයට මේ පොත් පත් එකතු කරන්න පුලුවනි. ඒ වගේම දරුවා ආසාවෙන් කියවන පොත් පත් පවා ඔවුන් වැඩෙන විට මතකයන් විදිහට විශේෂ තැනක් ලබා දීම දෙමව්පියන් විදිහට ඔබගේ වගකීමක්.
මෙම අධ්‍යනයේ ප්‍රධානී විදිහට කටයුතු කළ ඔස්ට්‍රේලියාවේ ජාතික විශ්ව විද්‍යාලයේ ” ඇනා සිගේරා ” පෙන්වා දෙන්නේ නිවසක පුස්තකාලයක් තිබීමෙන් දරුවන් තුළ බාලකාලයේ පටන්ම කියවීමේ හුරුව ගොඩ නැගීම නොදැනීම සිදු වෙන බවයි. ඒ නිසා නිවසේ පුංචි පුස්තකාලයක් තිපබන පසුබිමක ජීවත්වෙන දරුවන්ට කියවන හුරුව ගොඩ නැගීම ඒ තරම් අපහසු කටයුත්තක් නොවන බව ඇගේ අදහසයි.
ඒ වගේම කියවන හුරුව ඇති දරුවන් තුළ අවට පරිසරය සංජානනය කර ගැනීමේ හැකියාව ඉතා දියුණු මටට්මක පවතින බවත් මේ අධ්‍යනය මගින් සනාථ වී තිබෙනවා.
ඒ විතරක් නොවෙයි…තොරතුරු සන්නිවේදන තාක්ෂණය සමග ජීවත්වෙන තොරතුරු ලෝකයට කියවීමේ පුරුදු ඇති දරුවන්ට ඉතාම පහසුවෙන් අනුගත වීමට හැකියාව තිබෙනවා.මව්පියන්ට නොතිබුන අන්දමේ තොරතුරු සන්නිවේදන යුගයක දරුවන් ජීවත් වෙන අතර ඒ වෙනුවෙන් ඔවුන්ට වඩාත් සාර්ථක පසුබිමක් කියවීමේ පුරුදු වෙතින් ප්‍රගුන වෙන බවත් මෙම අධ්‍යනයෙන් පෙන්වා දෙනවා.
පොත් පත් කියවීමෙන් දරුවන්ගේ සංවර්ධනය සාහිත්‍ය සහ විශ්ව දැනුම ට පමණක් සීමා වෙන්නේ නැහැ. මේ දරුවන් තුළ ගණිතයටත් වැඩි හැකියාවක් ඇති බව දැන් පෙනී යන කරුණක්. ඒ නිසා නිවසක අඩුම වශයෙන් පොත් 80 ක වත් පුස්තකාලයක් තිබීම ඉතාම වැදගත් බැව් මේ අධ්‍යනය මගින් අවධාරනයෙන්ම පෙන්වා දෙනවා. දරුවන් වෙනුවෙන් නිවසේ පිහිටුවා තිබෙන පුස්තකාලය මොන තරම් වැදගත්ද යන්න ගැන අධ්‍යනයෙන් ලබා ගත් තොරතුරු ” pasific standerd ” මගිනුත් ප්‍රකාශයට පත් කර තිබෙනවා.
Saru FM Media
