සත්‍ය අසත්‍ය ගැන කතා කරන මේ මොහොතේ එක්සත් රාජධානියේ ආයෝජකයෙන් ආයෝජනය කර ආරම්භ කළ කර්මාන්තශාලාවක් අද මුළුමනින්ම වැසී 2000ක් මහපාරේ බවත් මේ වන විට අපට 2028 සිට ණය ගෙවීමට 5%ක ආර්ථික වර්ධන වේගයක් අවශ්‍ය බවත් කර්මාන්තශාලා වැසෙන විට මේ ආර්ථික වර්ධන වේගය කරා යා නොහැකි බවත් එදා ඇගලුම් කම්හල් 200 වැඩසටහන ආරම්භ කරන විට එය ආරම්භ කරන්න නොදී බිය ගැන්වූ පිරිස් සිටි බවත් එවැනි තත්ත්වයක් තුළ 5%ක ආර්ථික වර්ධන වේගයක් අපට වර්ධනය කළ යුතු බවත් එසේ නොවුවහොත් නැවත වරක් 2028 සිට ණය ගෙවන්න නොහැකිව බංකොලොත් වන බවත් එසේ වුවහොත් ආර්ථික සුනාමියකට රට යටත් වෙන බවත් විපක්ෂ නායක සජිත් ප්‍රේමදාස මහතා පැවසීය.Sri Lanka Latest News
විපක්ෂ නායක සජිත් ප්‍රේමදාස මහතා බව කියා සිටියේ අද පාර්ලිමේන්තුවේ දී ආර්ථිකය සම්බන්ධයෙන් සිය අදහස් දක්වමිනි.
මේ වන විට නෙක්ස්ට් කියන කර්මාන්තශාලාව වැසී ඇති බවත් එම කර්මාන්ත ශාලා හිමිකරුවාට අනුව මෙරට තුළ සුදුසු ආර්ථික සාමාජීය පරිසරයක් නොමැති බවත් පිරිවැය වැඩි වී ඇති නිසා ඉදිරියේ දී තවත් කර්මාන්තශාලා විශාල ප්‍රමාණයක් වැසී යාමේ අවදානමක් ඇති බවට ඇගලුම් කර්මාන්තශාලා හිමියන්ගේ සංගමය ප්‍රකාශ කරන බවත් මේ යථාර්ථය අවබෝධ කර ගත යුතු බවත් අද ආර්ථිකය වර්ධනය වෙනවා වෙනුවට ආර්ථිකය පණ ගන්වන කර්මාන්තශාලා වැසී යන බවත් විපක්ෂ නායකවරයා පෙන්වා දුන්නේය.
වහාම මේ නෙක්ස්ට කර්මාන්තශාලා හිමිකරු මුණ ගැසී සාකච්ඡා කරන ලෙසත් ඇගලුම් කම්හල් 200 වැඩසටහනින් ආදර්ශයක් ගන්නා ලෙස රජයෙන් ඉල්ලා සිටින බවත් අමාරු අවස්ථාවල රජය මැදිහත් විය යුතු බවත් සත්‍ය අසත්‍ය ගැන වාද විවාද කරන මේ මොහොතේ මේ ගැනත් සොයා බලන ලෙසත් වැඩ කරන ජනතාවගේ වීරයෝ ලෙසින් පෙනී සිටි මේ රජයේ වගකීම වන්නේ රටේ වැඩ කරන ජනතාව ආරක්ෂා කිරීම බවත් විපක්ෂ නායකවරයා පැවසීය.
කෝ අඩු කරනවා කිව්ව විදුලි බිල
රු. 9000 විදුලි බිල 6000 කරනවා කියා රජය කියු බවත් 33%කින් විදුලි බිල අඩු කරනවා යැයි රජය පැවසූ බවත් අනුර කුමාර දිසානායක ජනාධිපතිවරයා පවා මෙය පැවසූ බවත් විදුලි බිල අඩු කරනවා කියා රජය දැන් 18%කින් විදුලි බිල වැඩි කරන්න යන බවත් මෙ රජය පැවති අයිඑම්එෆ් ගිවිසුම අහෝසි කරනවා කියා පොරොන්දු වුවත් දැන් මේ අයිඑම්එෆ් ගිවිසුමට යට වී විදුලි බිල වැඩි කිරිමට සුදානම් බවත් දැන් විදුලි බිල වැඩි නොකළොත් අයිඑම්එෆ් වාරිකය ලබා ගත නොහැකි බවත් විපක්ෂ නායකවරයා පැවසීය.
විදුලි පාරිභෝගිකයන් 61 ලක්ෂයක් සිටින බවත් ඒකක 30 දක්වා ලක්ෂ 15ක් ඒකක 60 දක්වා ලක්ෂ 16ක් ඒකක 90 දක්වා තවත් ලක්ෂ 16ක් සිටින බවත් මේ පොඩි මිනිසා වෙනුවෙන් සහන ලබා දිය යුතු බවත් බොරු නොකියා ඇත්ත කතා කරන ලෙසත් විපක්ෂ නායකවරයා පැවසීය.
ආණ්ඩුව දැන් රට බේරාගත්ත රණවිරුවනුත් අමතකයි
රණවිරුවන් රණවිරු සැමරුම් ගැන සාකච්ඡා යන බවත් මේ රට ත්‍රස්තවාදයෙන් මුදවා ගත් රණවිරුවන් හා ආරක්ෂක අංශවලට රණවිරුවන් කියා පැවසීම ලැජ්ජාවට කරුණක් නොවන බවත් රණවිරු සැමරුමක් යනු ඇස්ඉස් මස් ලේ පරිත්‍යාග කළ රණවිරු පවුල් සුරැකීම බවත් මොවුන්ගේ සුබසාධනයට ශක්තිමත් වැඩපිළිවෙළක් ක්‍රියාත්මක කළ යුතු බවත් පසුගිය කාලයේ සිවිල් ආරක්ෂක ක්ෂේත්‍රයේ 34000ක් සොච්චම් මුදලක් ගෙවා ගෙදර යවන්න හැදු බවත් මේ රජයත් එවැනි ප්‍රතිපත්තියක් අනුගමනය කරන බවත් විපක්ෂ නායකවරයා වැඩිදුරටත් පැවසීය.
කයිවාරු නොගහ සමගි ජන බලවේගය හා පාතාලය අතර ඇති සම්බන්ධය හෙළි කරන්න
ඊයේ මහජන ආරක්ෂක ඇමතිවරයා සමගි ජන බලවේගයේ නායකයන් පාතාලය සමග සම්බන්ධ යැයි චෝදනා කළ බවත් පාතාලය සමග සම්බන්ධ සමගි ජන බලවේගයේ නායකයන් කවුද කියා හරියට ඔප්පු කරන ලෙසට ඉල්ලා සිටින බවත් කට තිබ්බ පලියට බොරු නොකියන ලෙසත් ජනතාව නොරවට්ටා ඇත්ත කියන ලෙසත් සමගි ජන බලවේගයට පාතාල සම්බන්ධතා නොමැති බවත් විපක්ෂ නායකවරයා පැවසීය.
රටේ ක්‍රියාත්මක මිනිමරු සංස්කෘතිය නැවැත්වීමට රජය කටයුතු නොකරන්නේ ඇයි ද කියා ගැටලුවක් ඇති බවත් මේ මිනිමරු කල්ලි ජනතාවගේ ජනජීවිත විනාශ කරන මොහොතක ඒ වෙනුවෙන් පැහැදිලි ක්‍රියාදාමයක් ගන්නා ලෙසත් විපක්ෂ නායකවරයා පැවසීය.
අද වන විට බඩු මිල වැඩි වෙලා
අද වන විට බඩු මිල වැඩි වී ඇති බවත් තක්කාලි 1114%කින් කැරට් 700%කින් ආදී එළවළු මිල අධික ලෙස වැඩි වී ඇති බවත් පවුලක් ලබන ආදායම මීට සාපේක්ෂව වැඩි නොවී ඇති බවත් රටේ ආර්ථිකය එක තැන හිර වී ඇති බවත් ආදායම් අඩු වී අසමානාත්මතාව වැඩි වි දුප්පත්කම මන්දපෝෂණය වැඩිවී ඇති බවත් මේ සත්‍ය ගැන රජයේ අවධානය යොමු කරන ලෙසත් විපක්ෂ නායකවරයා තවදුරටත් පැවසීය.
ලුණු ටිකවත් හරියට දෙන්න බැරි රජයක් මේක
අප රටේ ඒකපුද්ගල පාරිභෝජනය ලුණු ග්‍රෑම් 9.2ක් බවත් එය ග්‍රෑම් 5ක් ලෙස ලෝක සෞඛ්‍ය සංවිධානය පවසන බවත් අප රටේ වාර්ෂික ලුණු අවශ්‍යතාව මෙට්‍රික් ටොන් 180000ක් බවත් හම්බන්තොට පලටුපාන බූන්දල මන්නාරම අලිමංකඩ ආදී වරායවල 140000-150000ක් නිෂ්පාදනය කරන බවත් අප රටේ ලුණු අවශ්‍යතාව සපුරනවාද කියා ගැටලුවක් ඇති බවත් මේ රජයට හරියට ලුණු ටිකවත් දෙන්න නොහැකි බවත් කලට වේලාවට ඇතිවිය හැකි හිගයන් ගැන පුරෝකථනය කිරීමට නොහැකි වී ඇති බවත් විපක්ෂ නායකවරයා පැවසීය.
ආණ්ඩුව දන්නේ විහිලු කතා කියන්න විතරයි
ආණ්ඩුව දන්නේ විහිලු කතා කියන්න බවත් ට්‍රම්ප් ජනාධිපතිවරයා බදු පැනවීම දින 90කට අත්හිටවූයේ රජය යැවු ලිපිය නිසා යැයි විහිලු කතා කියන බවත් ඒකාබද්ධ නිවේදනයක් නිකුත් කරනවා කිව්වත් ඒකපාර්ශ්වීය නිවේදනයක් නිකුත් කරන බවත් මේවා විහිලු කතා බවත් දත්ත එක්ක කතා කරද්දි ආණ්ඩුවේ බොරු අහුවෙන බවත් විපක්ෂ නායකවරයා පැවසීය.
Saru FM Media
