හිටපු පාර්ලිමේන්තු මන්ත්‍රී හා TMVP නායක සිවනේසතුරෙයි චන්ද්‍රකාන්තන් හෙවත් ‘පිල්ලෙයාන්’ ඊයේ (අප්‍රේල් 8) මඩකලපුවේදී අපරාධ පරීක්ෂණ දෙපාර්තමේන්තුවේ (CID) නිලධාරීන් කණ්ඩායමක් විසින් අත්අඩංගුවට ගෙන ඇති බව වාර්තා වේ.
පොලිසිය ප්‍රකාශ කර ඇත්තේ, නැගෙනහිර විශ්වවිද්‍යාල උපකුලපති ලෙස සේවය කරමින් සිටියදී 2006 දී පැහැරගෙන ගොස් අතුරුදන් කළ මහාචාර්ය සිවසුබ්‍රමනියම් රවීන්ද්‍රනාත්ගේ සිද්ධියට අදාළව ප්‍රශ්න කිරීමට මෙම අත්අඩංගුවට ගැන්ම සිදුකළ බවයි.
වැඩිදුර පරීක්ෂණ සඳහා ඔහු දැනට කොළඹට ගෙනෙමින් සිටින බවද වාර්තා වේ.
පිල්ලයන් ලෙස ප්‍රසිද්ධ සිවනේසතුරෙයි චන්ද්‍රකාන්තන්, අර්ධ මිලිටරි නායකයෙකු සහ දේශපාලනඥයෙකු ලෙස කටයුතු කළ කාලය තුළ ප්‍රචණ්ඩ සිදුවීම් සහ යුද අපරාධ චෝදනාවලට සම්බන්ධ බවට චෝදනා ලැබ ඇත.
මහාචාර්ය රවීන්ද්‍රනාත් 2006 දෙසැම්බර් 15 වන දින කොළඹ ඉහළ ආරක්ෂක කලාපයක පැවති සම්මන්ත්‍රණයකට සහභාගී වීමෙන් පසු අතුරුදහන් විය. ඔහුව පැහැරගැනීමකට ලක් කළ බවට සාක්ෂි ලැබී තිබිණි. වාර්තා වලට අනුව, ඔහු පිල්ලයන් එවකට නායකත්වය දුන් දෙමළ මහජන විමුක්ති පුලිකල් (TMVP) වැනි අර්ධ මිලිටරි සංවිධානවලට සම්බන්ධ සන්නද්ධ කණ්ඩායම්වලින් තර්ජන මත සිටි අයෙකි. යුද්ධය අවසන් නොවූ මෙම කාලයේ කොටි සංවිධානයට විරුද්ධව මෙම කණ්ඩායම් ආරක්ෂක හමුදාවල නිහඬ සහයෝගය ඇතිව ක්‍රියාත්මක වූ බවට චෝදනා තිබුණි.
මෙම අතුරුදහන් වීමට පෙර, TMVP සමඟ සමීපව සම්බන්ධ කරුණා කණ්ඩායමේ සාමාජිකයින් බවට සැක කරන පිරිසක් විසින් නැගෙනහිර විශ්වවිද්‍යාලයේ කලා පීඨයේ පීඨාධිපති ආචාර්ය කේ. බාලසුකුමාර් පැහැරගෙන යාමෙන් පසු, මහාචාර්ය රවීන්ද්‍රනාත්ට ද තර්ජන එල්ල වී තිබිණි.
මහාචාර්ය රවීන්ද්‍රනාත්ගේ අතුරුදහන් වීමට පිල්ලයන්ගේ සෘජු සම්බන්ධතාවය තහවුරු කර නොතිබුණද, එම කාලපරිච්ඡේදයේදී TMVP හි ඔහුගේ නායකත්ව භූමිකාව හේතුවෙන් මෙම සිද්ධියට ඔහුගේ විය හැකි සම්බන්ධතාවය පිළිබඳව ප්‍රශ්න මතු වේ. තවත් අර්ධ මිලිටරි නායකයෙකු වන විනයගමූර්ති මුරලිදරන් (කරුණා අම්මාන්) ද මෙම නඩුව සම්බන්ධයෙන් CID විසින් මින් ඉහත ප්‍රශ්න කර ඇත. නමුත් රාජපක්ෂ හිතවාදීන් වූ මේ අයට එරෙහිව නීතිය ඉන් එහා ක්‍රියාත්මක නොවිණි.
පිල්ලයන්, දෙමළ විමුක්ති කොටි සංවිධානයේ නැගෙනහිර ඒකකයේ දෙවන ආඥාපති
ලෙස කටයුතු කළ විනයගමූර්ති මුරලිදරන් හෙවත් කරුණා අම්මාන්ගෙන් වෙන්වී ශ්‍රී
ලංකා රජය සමඟ එක්වීමෙන් පසු දෙමළ මහජන විමුක්ති පුලිකල් (TMVP) පිහිටුවා
ගත්තේය. 2008 වසරේදී නැගෙනහිර පළාත් සභා මැතිවරණයේදී TMVP ජයග්‍රහණය
කිරීමෙන් පසු පිල්ලයන් නැගෙනහිර පළාත් සභාවේ ප්‍රධාන අමාත්‍යවරයා ලෙස පත්
විය.
රජයේ ආරක්ෂාව යටතේ ක්‍රියාත්මක වූ සන්නද්ධ කණ්ඩායම්වලට එරෙහිව පුළුල් චෝදනා තිබියදීත්, මෙම අතුරුදහන් වීම තවමත් විසඳා නැති අතර නිල වගවීමක් ද සිදු වී නොමැත.
Saru FM Media
