සටහන – රුවන් නෙළුගොල්ල
අද වන විට ඇමරිකා එක්සත් ජනපදය ජාත්‍යන්තර වෙළඳාම තුළ ශ්‍රී ලංකාවෙන් ඇමරිකාවට කරන අපනයනවලට ප්‍රතිචාරාත්මක තීරු බදු සියයට 44ක් පනවා තිබෙන බවත් අද වන විට මුළු රටම මෙන්ම ජනාධිපතිවරයා ප්‍රමුඛ ආණ්ඩුවද කලබලයට පත්වී තිබෙන මේ ප්‍රශ්නය පිළිබඳව අපි අනතුරු ඇඟවීම් කළේ මීට මාස ගණනාවකට පෙර වුවත් රජය ඒ සම්බන්ධයෙන් අවධානය යොමු නොකළ බවත් පාර්ලිමේන්තුවේ මේ ගැන කතා කරන විට රජය රීති ප්‍රශ්න මතු කර මයික්‍රෝෆෝන පවා විසන්ධි කරමින් රජය තාවකාලික වින්දනයක් ලැබූ බවත් විපක්ෂ නායක සජිත් ප්‍රේමදාස මහතා පවසයි.
මේ ප්‍රතිචාරාත්මක තීරු බදු සියයට 44 ක් අපේ රටට පැනවීම හරහා අපේ රටේ අපනයන බරපතල අනතුරකට වැටී ඇති බවත් විශේෂයෙන්ම ඇඟලුම් ක්ෂේත්‍රය මහා උග්‍ර අර්බුදයකට මුහුණ දෙන බවත් මේ නිසා රණසිංහ ප්‍රේමදාස මැතිතුමා ආරම්භ කළ ඇඟලුම් කම්හල් 200 සහ අපේ රටේ අපනයන ක්ෂේත්‍රයෙන් ජීවත් වන ලක්ෂ ගණනකගේ රැකියා අනතුරේ වුවත් රජයට කිසිදු ගාණක් නොමැති බවත් රජය සුපුරුදු බොරුවම කියමින් ජනතාව රවටමින් සිටින බවත් විපක්ෂ නායකවරයා සඳහන් කළේය.
විපක්ෂ නායක සජිත් ප්‍රේමදාස මහතා මේ බව කියා සිටියේ ඊයේ (අප්‍රේල් 03) කොළඹදී පැවැති සමගි ජන බලවේගයේ පක්ෂ සම්මේලනය අමතමිනි
රජයට මේ කරුණු කාරණා පාර්ලිමේන්තුවේ දී ඉදිරිපත් කරණ විට මේ සම්බන්ධයෙන් සාකච්ඡා කරන්න විශේෂිත දුත කණ්ඩායමක් යවනවා කියා කිව්වත් ආණ්ඩුවෙන් එවැනි දූත කණ්ඩායම යැව්වේ කවදාද සහ ඒ සදහා යැවූ සාමාජිකයන් කවුද කියා දැන ගැනීමට අවශ්‍ය බවත් තවදුරටත් බොරු නොකියා මෙම දූත කණ්ඩායම හරහා ලබා ගත් ප්‍රගතිය කුමක්ද කියා අනාවරණය කරන ලෙසත් විපක්ෂ නායකවරයා වැඩිදුරටත් පැවසීය.
වහාම විශේෂිත නියෝජිත පිරිසක් ඇමෙරිකාවට යවන්න
අපේ රටේ අපනයන ආරක්ෂා කරන්නට විශේෂ වැඩසටහනක් අවශ්‍ය වන බවත් විශේෂ වෙළෙඳ නියෝජිතවරයෙක් සහ ජාත්‍යන්තර වෙළඳපොළ පිළිබඳව විශේෂඥ කණ්ඩායමක් පත් කර වහාම ඒ අය වොෂින්ටන් නුවරට යවා ඇමෙරිකානු ජනාධිපතිවරයා සමග සාකච්ඡා කළ යුතු බව පැවසූ සජිත් ප්‍රේමදාස මහතා මේ ගැන මීට පෙර අවස්ථා රැසකදී රජයට කිව්වත් රජය ඒවා තැකීමකට ලක් නොකළ බවත් සිහිපත් කළේය.
කර්මාන්තකරුවන් ආරක්ෂා කරන්න රජය ඉදිරිපත් නොවන්නේ නම් විපක්ෂය අපි ඉදිරිපත් වෙනවා
මේ රජයට රාජ්‍ය රාජ්‍යතාන්ත්‍රික සබඳතා රටට ශක්තියක් ලැබෙන සබඳතා ක්‍රියාත්මක කරන්න කිසිදු හැකියාවක් නැති බවත් අපේ රටේ අපනයන වලට මේ මරු පහර එල්ල වෙන මේ අවස්ථාවේ කර්මාන්ත කරුවන්ට කර්මාන්තශාලාවල සේවය කරන සියලුම සහෝදර සහෝදරියන්ට ඔබගේ රැකී රක්ෂා ආරක්ෂා කරන්න වගකිවයුතු විපක්‍ෂයක් ලෙස සමගි ජන බලවේගය ඔබ වෙනුවෙන් රට වෙනුවෙන් යුතුකම් ඉටුකරන බවත් විපක්ෂ නායකවරයා පැවසීය.
ගෝඨා රට බංකොලොත් කළා. අනුර දේශපාලනය බංකොලොත් කළා
Saru FM Media
