අද කාලයේ දෙමව්පියන් තමන්ගේ දරුවන්ට අවශ්‍ය විවිධ ආහාරපාන ලබා දීමට කිසිසේත්ම මැලි වෙන්නේ නැහැ. තමන්ගේ ශක්ති ප්‍රමාණයෙන් ඔවුන්ගේ රැචි අරැචිකම් අනුව විවිධ ආහාර ලබා දීමට ඔවුන් සූදානම්. ඒත් තමන්ගේ දරුවා මුල් කර ගෙන කවුරුන් හෝ මේ විදිහට කිව්වොත්…..දරුවන්ට කන්න බොන්න දෙනවා කියලා උජාරුවෙන් කිව්වට වැඩක් නැහැ…කන බොන හැටිවත් හරියට උගන්නලා නැහැ…මේ විදිහට ඔබේ දරුවා මුල් කර ගෙන කාට හෝ කීමට ගැලපෙන නිමිති ඔබේ දරුවා වෙතත් සමහර විට තිබෙන්න පුලුවන්. ඒ නිසා ආහාර ගැනීමේදී දරුවාට ඒ පිලිබඳව වූ සිරිත් විරිත් හොඳින් කියා දීම වැදගත්.
ආහාර ගැනීමේදී දරුවාට ශබ්ද නගා ආහාර විකන්න එපාය යන අවවාදය ලබා දෙන්න. ඇතැම් දරුවන් ශබ්ද නගනවා පමණක් නොව අසල සිටින අයට අවහිර වෙන සේ ආහාර අනුභව කිරීමට පවා යොමුව සිටිති. එක්තරා පිරිමි දරුවෙක් නිතරම කෑමමේසයේදී ඉදිරියේ සිටින අයගේ පිඟානට කෙළ ගසල පුරුද්දට යොමු ව සිටියේය. මෙය ඉතාම අප්‍රියජනක කරුණක් විය. පංතියේදී පවා සෙසු දරුවන්ගේ කෑම පෙට්ටියට පවා කෙළ ගැසීම නිසා බොහෝ දෙනක් මේ දරුවා අප්‍රිය කරන්නට වූයේ ඔහුගෙන් තිබුන හිරිහැරය නිසාය.
ආහාර ගැනීමේදී ඉඳුල් අතින් වීදුරුව , හැන්ද ඇල්ලීම වැරැදි බව කියා දෙන්න. නිතරම වම් අතින් වීදුරුව අල්ලන්න උපදෙස් දෙන්න.
ආහාර බෙදා ගැනීමේදී තමාට අවශ්‍ය පමණට බෙදා ගෙන තවත් අවශ්‍ය නම් නැවත බෙදා ගන්නවා මිස අනවශ්‍ය විදිහට ආහාර බෙදා ගෙන ඉවත දැමීම එතරම් හොඳ පුරුද්දක් නොවන බව කියා දෙන්න.
මස්, මාලු බිත්තර අතරින් එක් දෙයක් පමණක් බෙදා ගැනීමට උපදෙස් දෙන්න. සමහර දරුවන් මේ සියල්ලම බෙදා ගෙන අපතේ දමන අවස්ථා ඇත. ඒ නිසා බෙදා ගැනීමට පෙරාතුව ඒ ගැන කියා දෙන්න.
පිඟානෙන් ඉවත දමන දේ වීසි නොකොට පිගාන පැත්තක තබන්නට උපදෙස් දෙන්න. සමහර දරුවන් තමා නොකන දේ හැම තැනම විසිරෙන සේ ඉවත දමන අතර තවත් දරුවන් බත් කෑ තැන බිම සී සී කඩව විසිරුන බත් ඇට බොහෝය. බත් කන විට බිම හෙලීම හොඳ පුරුද්දක් නොවන බව ඔවුන්ට කියා දීම ඉතා වැදගත්.
අනුභව කරන විට ඇගිලි සියල්ල කටේ දමා ගැනීම නුසුදුසු බව කියා දෙන්න. සමහර දරුවන් ඇඟිල්ලක් එසැවී සිටින සේ ආහාර මුවට දමා ගැනීමට හුරුව සිටිති. එය අශෝභන බවත් දරුවන්ට තේරුම් කරන්න.
සමහර දැනුම් තේරුම් තිබෙන අය පවා කෑම ගැනීමේදී අප්‍රියජනක සිදුවීම් ගැන කතා බහ කරති. එවිට තවත් අයගේ ආහාර රුචිය නැති වීමේ පමණක් නොව ඔවුන් මුල් කර ගෙන ඇති වෙන්නේ ඉතාම අප්‍රසන්න බවකි.
ආහාර ගැනීමට පෙරාතුව අත් සේදීම වගේම අත්පිස්නාවන් බාවිතා කිරීම ගැන දැනුවත් කරන්න.ආහාර ගැනීමේදී මේසයේ සිටින සහ එකට ආහාර ගත් අය ආහාර ගෙන අවසාන වෙන තෙක් මේසයේ සිටින්න.අනවශ්‍ය විදිහට කලබල ඇති නොවන සේ සංන්සුන්ව සිටින්නනට දරුවා හුරු කරන්න.
හැදි ගෑරුප්පු හරඹය අපිට අවශ්‍ය නැතැයි යන ස්ථාවරයේ සිටිනු වෙනුවට අවශ්‍ය විටෙකදී හැදි ගෑරැප්පු භාවිතා කිරීමටත් දරුවා යොමු කරන්න. එවිට රෝමයට ගිය විට රෝමයේ විදිහට කියන්නා සේ දරුවාද යම් හැඩගැස්මක් ලබනු ඇත.බොහෝ දරුවන්ගේ ආහාර අනුභව කරන විට හැසිරෙන ආකාරය ගැන දෙමව්පියන් නොදැන සිටීමට බලපාන හේතු කීපයක් ඇත. ඒවා අතර ඔබත් එම පුරුදු තුළ සමහර විට සිටින්නනට ඉඩ ඇත.
පිටස්තර තැනකදී ආහාර ගැනීමේදී සීමාවන් තබා ගැනීමටත් දරුවන්ට උපදෙස් දෙන්න. ආගන්තුකයෙකු ලෙසින් ඔබ වෙනත් නිවසකට ගිය විට ඒ නිවසේ හැලියේ ප්‍රමාණය ගැන ශබට වැටහීමක් නැත. මේ නිසා අනවශ්‍ය විදිහට නැවත නැවත ඉල්ලීම මෙන්ම පමණට වඩා ආහාර ගැනීම විනයක් නොවන බව දරුවාට කියා දෙන්න. බුදුරජාණන්වහන්සේ දේශනා කළ පරිද්දෙන්ම ආහාරයෙන් පසු සෙසු කොටස ජලයෙන් පුරවා ගැනීම වැදගත්ය. හය හතර තේරෙන කාලය වෙන විට දරුවන්ට ඒ බව කියා දෙන්න. පිටස්තර නිවසකදී ඔවුන් අපහසුතාවයට පත් නොවන සේ ඔබේ දරුවා හැසිරෙන්නේ නම් එයින් වඩාත් ප්‍රංශසා ලබන්නේ ඔබයි.
“බලන්න…දරුවන් හදල තියෙන හොඳ …” ඔවුන් එසේ කියනු ඇත. ඒ කියන්නේ හදවතින්ම බව නොරහසක්. ඊට හේතුව වන්නේ ඔබේ දරුවා නිසා ඔවුන්ට කිසිම අපහසුතාවයන් ඇති නොවීමයි.
Saru FM Media
