කොළඹ ප්‍රදේශයේ අධ්‍යාපන ආයතනයක සිදුවූ සිද්ධියක් නිසා කලකිරීමෙන් 16 හැවිරිදි අම්ෂිකා සිසුවිය ගොඩනැගිල්ලකින් පැන දිවි නසා ගැනීමේ සිද්ධිය සම්බන්ධයෙන් සමාජ මාධ්‍ය ඔස්සේ පැතිර ගිය චෝදනා ප්‍රතික්ෂේප කරමින් එම අධ්‍යාපන ආයතනයේ උපාධිධාරී දෙමළ ගුරුවරයෙකු හා ජාජබ මැතිවරණ අපේක්ෂකයකු වන නාරායන පිල්ලේ සිවානන්දරාජා ප්‍රකාශයක් සිදු කර තිබේ.
තමන්ට මඩ ගසමින් කිසියම් කල්ලියක් සමාජ මාධ්‍ය ඔස්සේ අසත්‍යය පතුරන බව සීඅයිඩීයට පැමිණිලි කරන්නට ආ ඔහු මාධ්‍ය ඉදිරියේ සිද්ධිය සම්බන්ධ එල්ලව ඇති චෝදනා වලටද පිළිතුරු දුන්නේය.
චෝදනා සියල්ල පිළිගත නොහැකි අසත්‍ය ප්‍රකාශ ලෙස හඳුන්වා දුන් ඔහු තමා ජාජබ කොළඹ දිස්ත්‍රික් වැඩ කටයුතු සම්බන්ධීකාරකවරයා ලෙස ක්‍රියා කරන බැවින් දේශපාලන විරුද්ධවාදීන් විසින් මෙම සිද්ධිය ඔහුගේ චරිතය කෙළසීමට යොදා ගෙන ඇති බව පවසයි.
“ජනවාරි 18 වන දින තමයි අම්ෂිකා නම් මෙම සිසුවිය මගේ ආයතනයට බැඳුණේ. පළමු සතියේදීම ඇයට ලේ ගැලීමක් සහ සිහි නැති වීමක් සිදුවුණා. අපි ඇයව පළමුවෙන්ම ප්‍රථමාධාර ලබා දී, පසුව ඇගේ පියාට කතා කර දැනුම් දුන්නා,” යයි ගුරුවරයා සිය ප්‍රකාශයේ සඳහන් කරයි.
ඔහු වැඩිදුරටත් පැවසුවේ තවත් අවස්ථාවක එම සිසුවිය පන්ති කාමරය තුළදී මුර්ඡා වී වැටුණු බවත්, එවිට ද අනෙකුත් සිසුන් සහ ගුරුවරුන් සමඟ එක්ව ඇයට ප්‍රථමාධාර ලබා දී, පසුව ඇගේ පියා මගින් ගෙදර යැවූ බවත්ය.
ගුරුවරයා කියා සිටියේ තුන්වන සතියේදී තමන්ට දැනගන්නට ලැබුණේ එම සිසුවිය අසාමාන්‍ය හැසිරීමක් පෙන්නුම් කරන බවයි. තමා විසින් සිදු කළ නිරීක්ෂණයකදී එම සිසුවියගේ ශරීරයේ යම් විකෘතියක් (fits) තිබෙන බව දැක, ඇය සමඟ කතා කළ විට තමන් තනිවම රැඳී සිටින්නේ මන්දැයි ඇසු බව පවසයි.
“මම ඇයට කීවා ප්‍රධාන ශාලාවට යන්න, එහි රැඳී සිටින්න සහ ඇගේ මවට කතා කර ගන්න කියලා. ඒ අතරතුරදී ඇගේ මව පැමිණියා. මම ඇගේ මවට පැහැදිලි කළා, මෙම සිසුවිය හොඳින් සිටින්නේ නැති බවත්, ඇයට නිසි වෛද්‍ය ප්‍රතිකාර ලබා දිය යුතු බවත්,” ඔහු පැවසීය.
ගුරුවරයා තවදුරටත් පැවසුවේ, මව සමඟ කතා කරන අතරතුරදී ඔහු සිසුවිය තනිවම පන්ති කාමරයේ සිටිනු දුටු බවත්, පසුව ඔහු ඇගේ මව සමඟ කතා කරමින් සිටියදී, “අම්මා එන්න, අපි ගෙදර යමු” යැයි කියමින් සිසුවිය දෙමාපියන් සමඟ ඉක්මනින් ගිය බවත්ය.
“ඇය පෙබරවාරි 15 වැනි දින ගියා. ඉන් පසුව ඇය නැවත ආවාද නැද්ද යන්න ගැන මම දන්නැහැ. සමහර ශිෂ්‍යයින් මාසයකට දෙකකට පසුව හෝ මාස හයකට පසුව ආපසු එනවා. මම ඒ ගැන විශේෂ අවධානයක් යොමු කළේ නැහැ,” යයි ඔහු පැවසීය.
කෙසේ වෙතත්, පසුව සමාජ මාධ්‍ය වල පැතිර ගිය ප්‍රකාශයක,
“මම පන්ති කාමරයට ගොස් සිසුවිය අවදි කර ඇයට ඇගේ නම කියා ‘ඔබට ඔබගේ ගමේ ප්‍රශ්නයක් තිබේ, එබැවින් ඔබ පන්තියට ඒම නවත්වන්න’ යැයි මම කීවා” යයි කතාවක් ගොතා ඇති බවත් එය තමන්ට එරෙහිව නඟන ලද බොරු චෝදනාවක් බව පවසා ඇත.
“මෙම චෝදනාව සම්පූර්ණයෙන්ම අසත්‍යයි.
මම කිසි විටෙකත් පන්ති කාමරයට ගොස් නැහැ. ඇත්ත වශයෙන්ම, මම කිසි විටෙකත් පන්ති කාමර ආසන්නයට පවා නොයමි. පන්ති කාමරයක ශිෂ්‍යයින් පහක් සිටින විට පවා මම ඇතුළට ගොස් ශිෂ්‍යයින්ට බාධා කිරීමට අකමැති වෙමි,” යයි ඔහු තරයේ ප්‍රකාශ කරයි.
ඔහු තවදුරටත් පැවසුවේ මෙම සිද්ධිය සිදුවී දින 13කට පසුව සමාජ මාධ්‍ය හරහා තමන්ට එරෙහිව මෙවැනි චෝදනා නැගීම ගැන අවධානය යොමු කර ඇති බවයි. ඔහු පවසන්නේ විදුහල්පතිවරයා හෝ ආයතනයේ හිමිකරු කිසිවෙකු ද මෙම චෝදනා තහවුරු කර නැති බවයි.
“සත්‍ය ඉක්මනින් හෙළිවනු ඇත. මම ඒ ගැන වැඩිදුර කතා කිරීමට කැමති නැහැ, නමුත් සත්‍යය සත්‍ය ලෙසම හෙළිවනු ඇත,” ඔහු පවසයි.
ගුරුවරයා මෙම චෝදනා පිටුපස ඇති ප්‍රධාන හේතුව දේශපාලනිකයි යැයි සඳහන් කරයි. “මම දේශපාලනඥයෙකු නිසා තමයි මට මේ තරම් පහර දෙන්නේ. පසුගිය දින 67ක් තිස්සේ මට කිසිදු සැනසීමක් නැහැ. මගේ දෛනික කටයුතු අඩාල වෙලා. මාව කොළඹ ප්‍රදේශයේ අවඥාවට ලක් වූ පුද්ගලයෙකු බවට සමාජ මාධ්‍ය හරහා පත් කර තිබෙනවා,” ඔහු විස්තර කරයි.
ගුරුවරයා සිය පසුබිම පැහැදිලි කරමින් පවසන්නේ තමන් ජාජබ කොළඹ දිස්ත්‍රික් සංවිධායකවරයා සහ විධායක කමිටු සාමාජිකයකු ලෙස කටයුතු කරන බවත්, පසුගිය පාර්ලිමේන්තු මැතිවරණයේදී ඡන්ද 35,000කට වඩා ලබා ගත් ප්‍රමුඛ අපේක්ෂකයෙකු බවත්ය.
තමන් මේ දක්වා සිසුන් සමඟ කිසිදු ගැටලුවක් ඇති කර නොගත් බවත්, අවුරුදු 35ක් තිස්සේ අධ්‍යාපන ක්ෂේත්‍රයේ සේවය කරන බවත්, අඩු ආදායම්ලාභී සිසුන්ට නොමිලේ අධ්‍යාපනය ලබා දීමට පවා කටයුතු කර ඇති බවත් ඔහු අවධාරණය කරයි.
මේ අතර, ජාතික ළමා ආරක්ෂක අධිකාරිය විසින් මෙම සිදුවීම සම්බන්ධයෙන් විශේෂ පරීක්ෂණයක් ආරම්භ කර ඇති අතර අධිකාරිය කොටහේන සහ බම්බලපිටිය පොලිස් ස්ථානවලින් මෙම සිද්ධිය සම්බන්ධයෙන් නියාමන වාර්තා ඉල්ලා ඇත.
නාරායණ පිල්ලේ සිවානන්දරාජා ට මෙම සිද්ධිය සම්බන්ධයෙන් සිදුවූ අපහාසයන්ට එරෙහිව නීතිමය ක්‍රියාමාර්ග ගැනීමට තීරණය කර ඇති අතර සමාජ මාධ්‍ය ඔස්සේ පළ වූ චෝදනා නිසා තමන්ගේ චරිතයට හානි වී ඇති බව පවසයි.
Saru FM Media
