අභියාචනාධිකරණය ඊයේ (මැයි 08) දින ගත් තීරණයකට අනුව, මාර්ග සංවර්ධන අධිකාරියේ අධ්‍යක්ෂ ජනරාල් ධුරය සඳහා එස්.එම්.පී. සූරියබණ්ඩාර මහතා පත් කිරීමට ගත් තීරණය බලරහිත කර, එම තනතුර සඳහා කේ.ඩබ්ලිව්. කණ්ඩම්බි මහතා පත් කිරීමට ප්‍රවාහන හා මහාමාර්ග අමාත්‍යවරයාට සහ මාර්ග සංවර්ධන අධිකාරියට නියෝග කර තිබේ.
මෙම විවාදාත්මක පත්කිරීම සම්බන්ධයෙන් ඉදිරිපත් වූ පෙත්සමක් විභාග කිරීමෙන් අනතුරුව මෙම තීරණය ගෙන ඇත. පෙත්සමේ සඳහන් වූයේ මාර්ග සංවර්ධන අධිකාරියේ අධ්‍යක්ෂ ජනරාල් තනතුර සඳහා පැවති සම්මුඛ පරීක්ෂණයේදී වැඩි ලකුණු ලබාගත් කේ.ඩබ්ලිව්. කණ්ඩම්බි මහතාට වඩා අඩු ලකුණු ලබාගත් එස්.එම්.පී. සූරියබණ්ඩාර මහතා එම තනතුරට පත් කර ඇති බවයි.
අභියාචනාධිකරණයේ වැඩබලන සභාපති විනිසුරු මොහොමඩ් ලෆාර් තාහිර් සහ විනිසුරු සරත් දිසානායක යන මහත්වරුන්ගෙන් සැදුම්ලත් විනිසුරු මඩුල්ල හමුවේ මෙම රිට් පෙත්සම විභාග කර අදාළ තීන්දුව ප්‍රකාශයට පත් කරන ලදි.
පෙත්සම්කරු වෙනුවෙන් පෙනී සිටි ජනාධිපති නීතිඥ ෆයිසර් මුස්තාෆා මහතා, සිවිල් ඉංජිනේරුවරයකු වන තම සේවාදායකයා වසර 23 කට ආසන්න කාලයක් මාර්ග සංවර්ධන අධිකාරියේ සේවය කළ පළපුරුදු සේවකයකු බව අධිකරණයට පැහැදිලි කළේය. මාර්ග සංවර්ධන අධිකාරියේ අධ්‍යක්ෂ ජනරාල් තනතුර සඳහා පැවැත්වූ සම්මුඛ පරීක්ෂණයේදී කණ්ඩම්බි මහතා ලකුණු 61 ක් ලබාගත් අතර, එම සම්මුඛ පරීක්ෂණයටම ඉදිරිපත් වූ සූරියබණ්ඩාර මහතා ඊට වඩා අඩු ලකුණු ප්‍රමාණයක් ලබාගත් බව ඔහු පෙන්වා දුන්නේය.
සම්මුඛ පරීක්ෂණයේ ප්‍රතිඵල එසේ තිබියදී, 2024 මාර්තු 05 වන දින මාර්ග සංවර්ධන අධිකාරිය විසින් අඩු ලකුණු ලබාගත් සූරියබණ්ඩාර මහතා එම තනතුරට පත් කිරීමට තීරණය කර ඇති බවත්, මෙය නීතියට පටහැනි ක්‍රියාවක් බවත් ජනාධිපති නීතිඥවරයා තර්ක කළේය. එම නිසා අඩු ලකුණු ලබාගත් පුද්ගලයකු එම තනතුරට පත් කිරීමට ගත් තීරණය බලරහිත කර,
වැඩි ලකුණු ලබාගත් තම සේවාදායකයා වන කණ්ඩම්බි මහතා එම තනතුරට පත් කිරීමට නියෝගයක් නිකුත් කරන ලෙස ඔහු අධිකරණයෙන් ඉල්ලා සිටියේය.
සියලු කරුණු සලකා බැලීමෙන් පසු, අභියාචනාධිකරණයේ වැඩබලන සභාපති විනිසුරු මොහොමඩ් ලෆාර් තාහීර් මහතා ප්‍රකාශ කළේ, මෙම පත්කිරීම සිදු කිරීමේදී වගඋත්තරකරුවන් පත්වීම් පටිපාටිය උල්ලංඝනය කර ඇති බවයි. මෙම ක්‍රියාවලිය සම්පූර්ණයෙන්ම නීතිවිරෝධී බවට තීරණය කළ අභියාචනාධිකරණය, පෙත්සම්කරු ඉල්ලා ඇති සහන ප්‍රදානය කරමින්, සූරියබණ්ඩාර මහතාගේ පත්කිරීම බලරහිත කර, එම තනතුර සඳහා කේ.ඩබ්ලිව්. කණ්ඩම්බි මහතා පත් කිරීමට ප්‍රවාහන හා මහාමාර්ග අමාත්‍යවරයාට සහ මාර්ග සංවර්ධන අධිකාරියට නියෝග කළේය.
මෙම නඩු තීන්දුව මගින් රාජ්‍ය ආයතන විසින් පත්කිරීම් සිදු කිරීමේදී නිසි පටිපාටිය අනුගමනය කිරීමේ වැදගත්කම යළිත් වරක් අවධාරණය කර ඇත. සුදුසුකම් සහ ලකුණු මත පදනම්ව පත්කිරීම් සිදු කළ යුතු බවත්, වෙනත් සාධක මත පදනම්ව ගනු ලබන තීරණ නීතියට පටහැනි විය හැකි බවත් මෙම තීන්දුව මගින් පැහැදිලි කර ඇත.
Saru FM Media
