තිස් වසරකට අධික කාලයක් මෙරට වෙළාගෙන සිටි රුදුරු එල්.ටී.ටී.ඊ ත්‍රස්තවාදය පරාජය කර අදට (18) වසර 16ක් සපිරෙනවා.
2009 වසරේ මැයි 18 වනදා එල්.ටී.ටී.ඊ නායක වේළුපිල්ලේ ප්‍රභාකරන් නන්දිකඩාල් කලපුවේ දී මෙරට විරෝධාර රණවිරුවන් අතින් මියයාමත් සමඟ රට තුළ තිස් වසරකට වැඩි කාලයක් පැවති යුද්ධය නිමාවට පත් වුණා.
යුධ ජයග්‍රහණයට වසර 16ක් සපිරීම නිමිත්තෙන් ‘ජාතික රණවිරු දින සැමරුම් උත්සවය’ හෙට (19) දිනයේ පැවැත්වීමට නියමිතව තිබෙනවා.
ශ්‍රී ජයවර්ධනපුර කෝට්ටේ පිහිටි ජාතික රණවිරු ස්මාරකය අභියස දී හෙට පස්වරු 4.00 සිට 6.00 දක්වා මෙම සැමරුම් උත්සවය පැවැත්වීමට නියමිතයි.
මෙවර ජාතික රණවිරු දින සැමරුම් උත්සවය ආරක්ෂක නියෝජ්‍ය අමාත්‍ය විශ්‍රාමික මේජර් ජනරාල් අරුණ ජයසේකරගේ ප්‍රධානත්වයෙන් පැවැත්වෙන අතර, මෙම උත්සවය වෙනුවෙන් කුරිරු ත්‍රස්තවාදය නිමා කිරීමට ත්‍රිවිධ හමුදාවට නායකත්වය ලබාදුන් ෆීල්ඩ් මාර්ෂල් සරත් ෆොන්සේකා, අද්මිරාල් ඔෆ් ද ෆ්ලීට් වසන්ත කරන්නාගොඩ සහ මාර්ෂල් ඔෆ් ද එයාර් ෆෝස් රොෂාන් ගුණතිලක ද සහභාගී වීමට නියමිතයි.
Saru FM Media
