හිටපු ජනාධිපති මෛත්‍රීපාල සිරිසේන මහතා සමග හිරු ටීවී නාලිකාව පසුගියදා සම්මුඛ සාකච්ඡාවක් පැවැත්වූවා. එහිදී හිටපු ජනාධිපතිවරයාගෙන් මාධ්‍යවේදියා විමසූ ඇතැම් ප්‍රශ්නවලට ඉතා සැහැල්ලුවෙන් සිරිසේන මහතා පිළිතුරු ලබාදුන් අතර, එම සම්මුඛ සාකච්ඡාවෙන් උපුටාගත් කොටසක් පහත දැක්වේ. Sri Lanka Latest News
මාධ්‍යවේදියා
ඔබතුමාව නිතර මතක් වෙන කාලයක් තමයි මේ දින වකවානුව?
මෛත්‍රීපාල සිරිසේන
මොනවද?
මාධ්‍යවේදියා
හෙට අනිද්දා උදාවෙන්නේ කවද්ද කියලා? ඔබට මතක ඇති?
මෛත්‍රීපාල සිරිසේන
මොනවද හෙට අනිද්දා උදාවෙන්නේ? මගේ ඔළුවේ තියෙන්නේ වෙසක්. ඇයි අපි සිංහල අවුරුද්ද පහුකෙරුවා. සිංහල අවුරුද්දෙන් පස්සේ වෙසක් එනවා. බුදුන් වහන්සේගේ ඉපදීම, බුදුවීම සහ පරිනිර්වාණය. අපේ ඔළුවේ මේ දවස්වල වැඩකරන්නේ වෙසක් එකට මොනවද කරන්නේ කියලා. අපි දන්සල් දිගටම දෙනවා.
මාධ්‍යවේදියා
දැන් ඔබතුමාගේ ඔළුවේ වැඩකරන්නේ ඒවාද?
මෛත්‍රීපාල සිරිසේන
ඔව්. මේ දවස්වල ඒවා.
මාධ්‍යවේදියා
ඔබතුමාට අමතකද අප්‍රේල් 21 පාස්කු ඉරුදින ප්‍රහාරය?
මෛත්‍රීපාල සිරිසේන
ඔව්. අමතක වෙන්නේ නෑ. මට ඒක විශේෂයක් නෑනේ ඉතින්.
මාධ්‍යවේදියා
නමුත් ඔබ ඒ වෙලාවේ රටේ හිටපු ජනාධිපතිවරයානේ?
මෛත්‍රීපාල සිරිසේන
ඔව්. ඉතින්?
මාධ්‍යවේදියා
ඒ ඛේදවාචකය පිළිබඳ මේ සමාජය තවමත් කතා කරනවා.
මෛත්‍රීපාල සිරිසේන
ඕවා ඉතින් දැන් හරි කල් ගිය ප්‍රශ්නනේ. ඕක ඔච්චර කතාකරලා වැඩක් නෑනේ.
මාධ්‍යවේදියා
ඉතින් ඔබ හොයලා දුන්නෙත් නෑනේ මහමොළකාරයා.
මෛත්‍රීපාල සිරිසේන
මම හෙව්වද, මගෙන් පස්සේ හෙව්වද දැන් ඉන්න අය හොයනවද…
මාධ්‍යවේදියා
ඔබට කනගාටුවක් නැද්ද පාස්කු ඉරුදින ප්‍රහාරය සම්බන්ධයෙන්?
මෛත්‍රීපාල සිරිසේන
මොකද කනගාටුවක් නැත්තේ? වේදනාවක් තියෙනවා. ඒ වේදනාවට මම කරන්න ඕනේ දේවල් කෙරුවනේ. මැරිච්ච මිනිස්සුන්ට වන්දි ගෙව්වා. අතපය කැඩිච්ච අයට වන්දි ගෙව්වා. පල්ලි ටික ඔක්කොම හදලා දුන්නා.
මාධ්‍යවේදියා
ඔබතුමා සමාවත් ඉල්ලුවා කතෝලික ජනතාවගෙන්?
මෛත්‍රීපාල සිරිසේන
ඔව් ඒ සියලු දේ මම කරලා දුන්නා ඒ ජනතාවට. ඒ ඔක්කොම හදලා දුන්නේ මම ජනාධිපති කාර්යාලයෙන්. කොච්චිකඩේද, මඩකළපුවේද, කටුවපිටියෙද.
මාධ්‍යවේදියා
ඔබට කනගාටුවක් නැද්ද ඒ මොහොතේ හිටපු ජනාධිපතිවරයා විදියට මට මේක පාලනය කරගන්න තිබුණා නම් කියලා?
මෛත්‍රීපාල සිරිසේන
එහෙම නම් ඉතින් අහන්න ඕනේ ජේ.ආර්. ජයවර්ධනගෙන්, ප්‍රේමදාස ජනාධිපතිතුමාගෙන්, මහින්ද රාජපක්ෂගෙන්, චන්ද්‍රිකා බණ්ඩාරනායකගෙන්. ඔය ඔක්කොගෙන්ම. අවුරුදු තිස් ගානක් මේ රටේ තිබ්බ යුද්ධෙදී ලක්ෂෙකට වඩා මිනිස්සු මැරුණා.
මාධ්‍යවේදියා
ඔබ කියන්නේ එහෙම නම් ඒ හිටපු නායකයොත් ඒවට වගකියන්න ඕනේ කියලා?
මෛත්‍රීපාල සිරිසේන
නෑ, මම අහන්නේ ඔයා මගෙන් මේ අහන එක ඔයා ජේ.ආර්. ජයවර්ධන මහත්තයව පුළුවන් නම් ගෙන්නගෙන අහන්න. ආර්. ප්‍රේමදාස මහත්තයාගෙන් අහන්න. චන්ද්‍රිකා මැතිනියගෙන් අහන්න. මහින්ද මහත්තයගෙන් අහන්න.
මාධ්‍යවේදියා
ඒවයි, මේකයි අතර වෙනසක් තියෙනවා නේද? මේ ප්‍රහාරයේ තොරතුරු තියෙද්දිනේ වළක්වාගන්න බැරි වුණේ?
මෛත්‍රීපාල සිරිසේන
එහෙනම් ඒවත් ඇයි ඒගොල්ලේ වළක්වා ගත්තේ නැත්තේ? දළදා මාලිගාවට ගැහුවා. කීදෙනෙක් ගැහුවද? දළදා මාලිගාවට දෙගොල්ලක් ගැහුවා.
මාධ්‍යවේදියා
කවුද දෙගොල්ලෝ?
මෛත්‍රීපාල සිරිසේන
ප්‍රභාකරනුත් ගැහුවා, තව කට්ටියකුත් ගැහුවා. ඒක ඔක්කොම දන්නවා.
මාධ්‍යවේදියා
ඇයි ඔබ ඒ කට්ටිය ගැන කියන්නේ නැත්තේ?
මෛත්‍රීපාල සිරිසේන
මම කියන්නේ මොකටද, රටම ඒක දන්නවනේ?
මාධ්‍යවේදියා
ඔබ කියන්නේ මේ ආණ්ඩුවට තියෙන චෝදනාවද?
මෛත්‍රීපාල සිරිසේන
මම කාටවත් චෝදනා කරන්නේ නෑනේ.
මාධ්‍යවේදියා
ඇයි ඔබතුමා ඇඟබේරගෙන කතාකරන්නේ?
මෛත්‍රීපාල සිරිසේන
හැංගෙන්නේ නෑ. මම කියන්නේ ඉතිහාසය. ඉතිහාසයේ තියෙන කරුණු මම මේ කියන්නේ. අපි මැරිලා ඉපදිච්ච මිනිස්සු නෙවෙයි.
මාධ්‍යවේදියා
ඔබතුමා මේ ආණ්ඩුවට බයයිද ඔබගෙන් යම් පලිගැනීමක් කරයි කියලා?
මෛත්‍රීපාල සිරිසේන
නෑ.
මාධ්‍යවේදියා
එහෙම නැත්නම් පාස්කු ප්‍රහාරයට ඔබව සම්බන්ධ කරගනී කියලා?
මෛත්‍රීපාල සිරිසේන
නෑ නෑ. මට එහෙම බය වෙන්න කිසිම හේතුවක් නෑ. ඒකට මගේ කිසිම සම්බන්ධයක් නැති නිසා.
මාධ්‍යවේදියා
ඔබතුමා කෝටි 10 ගෙවලා ඉවරද?
මෛත්‍රීපාල සිරිසේන
ඒක මුළු රටම දන්නවනේ. කෝටි 10 ගෙවලා ඉවර වෙලා කොච්චර කාලයක්ද?
මාධ්‍යවේදියා
විවිධ අය ඔබට චෝදනා කරනවා මේ ප්‍රහාරයට ඔබ වගකියන්න ඕනේ කියලා. ඔබට මේක පාලනය කරගන්න තිබුණා කියලා. ඔබට එහෙම චෝදනා නැගෙන එක සම්බන්ධයෙන් වේදනාවක් තියෙනවද?
මෛත්‍රීපාල සිරිසේන
මට කොච්චර වේදනාවක් තිබුණත් ඒ වේදනාව පාලනය කරගන්න හැටිත් මම දන්නවා. මගේ හිතේ අමාරු කොච්චර ආවත් මොන විවේචන මට ආවත් ඒවා පාලනය කරගැනීමට මම දන්නවා. බුදු හාමුදුරුවන්ට කොච්චර මිනිස්සු දොස් කිව්වද? බුදු හාමුදුරුවෝ පාරිලෙයිය වනයට වැඩියේ බුදුහාමුදුරුවන්ට ජේතවනාරාමයේ හාමුදුරුවන් එක්ක ඉන්න බැරුව. හාමුදුරුවරු රණ්ඩු වෙනවා බේරන්න බෑ. ඒ ගමන බුදුන් වහන්සේ වනගත වුණා. ඊට පස්සේ හාමුදුරුවරුන්ටම තේරුණා මාස කීපයක් යනකොට බුදුහාමුදුරුවෝ නෑ කියලා. ඒ නිසා ගිහින් ආපහු උන්වහන්සේව වඩම්මගෙන ආවා. එතකොට මහත්මා ගාන්ධිතුමා අවිහිංසාවාදී නායකයෙක්. දේශපාලනඥයෙක් නෙවෙයි. සාන්තුවරයෙක්. එතකොට මහත්මා ගාන්ධිතුමා ඔහොම ඉස්සරහට එනකොට එයාව මරපු ඝාතකයා නෙලුම් මල් පොකුරක් අරගෙන ඇවිත් අතට දෙනවා එක්කම එතුමා ඒ නෙලුම් මල් අතට ගන්නකොටම ඝාතකයාගේ ඉණේ තිබුණු පිස්තෝලය ඇදලා අරගෙන වෙඩි තියාගෙන ගියා. අමතක කරන්න එපා ඒ වෙඩි තිබ්බේ කවුද කියලා. මාධ්‍යවේදියෙක් තමයි එදා වෙඩි තිබ්බේ. ඔහු පත්තර කර්තෘවරයෙක්.
මාධ්‍යවේදියා
පත්තර කර්තෘවරයෙක්, මාධ්‍යවේදියෙක් කියලා ඔබතුමා අමුතු විදියට බලලා කියන්නේ ඇයි? ජනමාධ්‍යවේදීන් ගැන සැකයක් තියෙනවද?
මෛත්‍රීපාල සිරිසේන
අනේ ජනමාධ්‍යවේදීන් ගැන මගේ කිසි සැකයක් නෑ. නමුත් ඒක විශ්වාස කරන්න පුළුවන් දෙයක්ද? බණ්ඩාරනායක මහත්තයාටත් ස්වාමින්වහන්සේ නමක්නේ වෙඩි තිබ්බේ. මේ සමාජය එහෙම තමයි.
මාධ්‍යවේදියා
පිල්ලෙයාන්ව පාස්කු ප්‍රහාරයට කොටු කරන්න සැලැස්මක් තියෙනවා කියලා කතාබහක් යනවා. ඒ ගැන ඔබ හිතන්නේ මොකක්ද?
මෛත්‍රීපාල සිරිසේන
ඕවාට උත්තර දෙන්න ගිහිල්ලා ඒ දෙන්න එළියට ආවට පස්සේ මාව මරන්න පුළුවන්.
මාධ්‍යවේදියා
ඒ කියන්නේ ඔවුන් දැනුත් ඒ වගේ අපරාධ කරන අයද?
මෛත්‍රීපාල සිරිසේන
දන්නේ නෑනේ. කලින් එල්.ටී.ටී.ඊ. එකේ ඉන්නකොට සිය ගණන් මැරුවා නම්, දැන් ආයෙත් කාට හරි එකක් තියන්න හිතෙයිද කියන්න අපි දන්නේ නෑනේ. විශ්වාස කරන්න බෑ.
මාධ්‍යවේදියා
පාස්කු ප්‍රහාරයත් කළාද දන්නේ නෑ එහෙම නම්?
මෛත්‍රීපාල සිරිසේන
අපි දන්නේ නෑ කවුරු කළාද කියලා.
මාධ්‍යවේදියා
එහෙම නම් ඒ සැකය සාධාරණයි නේද?
මෛත්‍රීපාල සිරිසේන
ඔව් ඉතින් සැකය සාධාරණයි. නමුත් ඕනේ තරම් සැකයට ලක්වෙන කරුණු වගේම සැකය ඉවත් වෙන කරුණුත් තියෙනවා.
මාධ්‍යවේදියා
පාස්කු ප්‍රහාරය එල්ල වෙන වෙලාවේ රනිල් වික්‍රමසිංහ මහත්තයා රටේ අගමැති. ඇයි ඔහුට කිසිම චෝදනාවක් නැත්තේ?
මෛත්‍රීපාල සිරිසේන
ඕවා ඉතින් දැන් හරි කල්ගිය ප්‍රශ්නනේ.
මාධ්‍යවේදියා
දැනට ඔබතුමාව විතරනේ දඬුකඳේ ගහන්න උත්සාහ කරන්නේ ඔබතුමා ඒ වෙලාවේ ජනාධිපති කියලා. ඒ වුණාට අගමැතිටත් වගකීමක් තියෙනවනේ?
මෛත්‍රීපාල සිරිසේන
ඒකනේ මම අර මරපු නායකයන්ගේ නම් ටික කිව්වේ. ඒ වගේ මහා මානවාවදී ශ්‍රේෂ්ඨයෝ මරලා දාපු එකේ අපි වගේ මිනිහෙක්ව විවේචනය කරන ඒවා, බෝරු චෝදනා කරන ඒවා සාමාන්‍ය දේවල්. බුදුන් වහන්සේටත් කොච්චර චෝදනා කළාද?
මාධ්‍යවේදියා
රනිල් වික්‍රමසිංහ මහත්තයට මේ සම්බන්ධයෙන් වගකීමක් නැද්ද?
මෛත්‍රීපාල සිරිසේන
හිටපු රජයේ අයගේ වගකීමක් තියෙනවා. රජයේ වගකීම තිබුණට ඒ තොරතුරු ලැබිච්ච අය කියන්න ඕනනේ රජයේ දේශපාලන නායකයන්ට?
මාධ්‍යවේදියා
අගමැතිතුමාටත් ඒ තොරතුරු ලබාදුන්නා කියලා කියනවා?
මෛත්‍රීපාල සිරිසේන
නෑ නෑ… කොහෙද තියෙන්නේ? අගමැතිගෙයි ජනාධිපතිගෙයි ආරක්ෂාවට ඉන්න ඩී.අයි.ජී.ලා දෙන්නටවත් තොරතුරු එවලා නෑ මෙහෙම එකක් තියෙනවා, ඒ නිසා ආරක්ෂාව තරකර ගන්න කියලා.
මාධ්‍යවේදියා
එහෙම තොරතුරු ආවා නම් මේක වළක්වා ගන්න තිබුණා කියලද ඔබ කියන්නේ?
මෛත්‍රීපාල සිරිසේන
ඔව්. වළක්වාගන්න තිබුණා. එහෙම නම් මම පිටරට යන්නෙත් නෑ. මම අවශ්‍ය පියවර ගන්නවා.
මාධ්‍යවේදියා
සමහරු පිළිගන්නේ නෑ ඔබ කියන්නේ ඇත්ත කියලා?
මෛත්‍රීපාල සිරිසේන
එහෙම මිනිස්සු ලෝකේ ඉන්නවා. ලෝකේ ඉන්නවා මනුස්සයෝ ඉන්නවා, එළහරක් ඉන්නවා, බලු පැටව් ඉන්නවා, නොයෙක් ජාතියේ අය ඉන්නවනේ.
මාධ්‍යවේදියා
එහෙම නම් වර්තමාන රජය මොනවද මේ පාස්කු ප්‍රහාරය සම්බන්ධයෙන් කියනවා කියලා කියන්නේ?
මෛත්‍රීපාල සිරිසේන
ඕක ඉතින් ඔච්චර කතා කරලා වැඩක් නෑ.
මාධ්‍යවේදියා
සැහැල්ලු කාරණයක් නෙවෙයි හිටපු ජනාධිපතිතුමනි උත්තරයක් නෑ, ඔබතුමාටත් මේ ප්‍රශ්නේ කරත්තේ බැඳි රෝදේ වගේ පස්සෙන් පන්නගෙන එනවා ඔබතුමාගේ පස්සෙන්?
මෛත්‍රීපාල සිරිසේන
ඒක මගේ පස්සේ එළෙව්වට මට කමක් නෑ. මම ඒකනේ කිව්වේ අවුරුදු 30ක යුද්ධය ගැන කතාකරන්නේ නැතුව අද මේ රටේ අද වෙනකල් මොන ආණ්ඩුවක්වත්, මොන ලේඛකයෙක්වත්, මොන මාධ්‍යවේදියෙක්වත් අවුරුදු 30ක යුද්ධය ගැන හරිහැටි පොතක් ලියලා තියෙනවද? ඔයා මේ පාස්කු සිද්ධිය ගැන පස්සෙන් එළවනවා. අරවත් අහන්නකො ඇයි මේ කාටවත් මේ ගැන නිවැරැදිව පොතක් ලියන්න බැරි කියලා?
මාධ්‍යවේදියා
ඔබතුමාට ලියන්න බැරිද යුද්ධය ගැන පොතක්?
මෛත්‍රීපාල සිරිසේන
යුද්ධය කරපු ජෙනරල්ලා කී දෙනෙක් දැන් මැරිලද? ඒවා ඒ කාලේ කරන්න තිබුණා. මහාවංශයටත් ඒක එකතු වෙන්න ඕනේ. කොහොමද එකතු වෙන්නේ? හමුදාවේ හිටපු නිලධාරීන් තමන්ගේ දක්ෂතා ගැන, තමන් ගැන ලියපු පොත් තියෙනවා.
මාධ්‍යවේදියා
නූතන මහාවංශයට මේ යුද්ධය අවසන් වීම කියන කාරණාව එකතු වෙලා තියෙනවා?
මෛත්‍රීපාල සිරිසේන
එකතු කරලා ඇති.
මාධ්‍යවේදියා
මහාවංශයට පාස්කු ප්‍රහාරය එකතු වෙලා තියෙනවද කියන එක තමයි හොයන්න ඕනේ?
මෛත්‍රීපාල සිරිසේන
ඒක ඉතින් අපි දන්නේ නෑනේ. මම යන්නේ නෑනේ මහාවංශය ලියන අය හම්බවෙන්න.
මාධ්‍යවේදියා
පාස්කු ප්‍රහාරය සම්බන්ධයෙන් මිරිඟුවක් පස්සෙද එතකොට මේ එළවන්නේ?
මෛත්‍රීපාල සිරිසේන
ඔය වගේ සිද්ධි කොච්චර රටවල සිද්ධ වෙනවද? එකක් දෙකක් නෙවෙයි. පාස්කු ප්‍රහාරය එල්ල වෙනකොට ඊට ඉස්සෙල්ලා අවුරුදු 2ක් යුරෝපයේ රටවල් කීයකට අයි.එස්.අයි.එස්.ලා ගැහුවද? ඒවායේ ඉන්න අය කෑගහනවද මේවා ගැන? ඒගොල්ලෝ යමක් තේරුම් ගත්තා, එතැනින් ඒක ඉවරයි. මේවා මේ වෙන න්‍යායපත්‍ර එක එක්කෙනාගේ.
මාධ්‍යවේදියා
අපේ රට ඇතුළෙද? නැන්තනම් ජාත්‍යන්තර වශයෙන්ද?
මෛත්‍රීපාල සිරිසේන
නෑ නෑ අපේ රට ඇතුළේ ඉන්න අයගේ න්‍යායපත්‍ර.
Saru FM Media
