“මම රිලේෂන්ශිප් එකෙන් බ්‍රේකප් වුණාට පස්සේ මැරි කරන්න කිසිම කැමැත්තක් තිබුණේ නෑ..ඇත්තටම ඇත්ත කිව්වොත් අද ඔයාව බලන්න ආවෙත් අම්මගෙ බලකිරීමට”
ඉසුරු එහෙම කියද්දී නිමාලිට ඇති වුණේ වේදනාවක්. ඇයටත් අහිමි වී ගිය ප්‍රේමයක් තිබෙනවා. ඇය ඒ වේදනාව නිසාම නැවත සම්බන්ධයක් පටන් නොගන්නට අදහස් කරගෙන සිටියේ. පුවත්පත් මංගල යෝජනාවකින් ඉසුරු එය බැලීමට එන්නේ ඒ කාලයේදී. දෙදෙනාට තනියම කතා කරන්නට ලැබුණු මුල්ම අවස්ථාවේදී ඉසුරු ඔහුගේ පැරණි පෙම්වතිය වූ පාරමී ගැන හෙළි කළා. පාරමීගේ නිවසේ අය ඔහුට අකමැති වූයේ කුල ප්‍රශ්ණයක් නිසා බව ඉසුරු පැවසුවේ වේදනාවෙන්.
“අපේ රටේ කිසිම දියුණුකමක් කියලා හිතෙන්නේ ඔහොම දෙයක් අහන වෙලාවට. තවමත් කුලය ගැන හිතලා ළමයින්ගෙ ආදර සම්බන්ධතා කඩලා දාන දෙමවුපියෝ ඕන තරම් ඉන්නවා.”
නිමාලි එසේ පැවසුවේ ඇයට ඉසුරු ගැන සැබෑවටම දුකක් ඇති වූ නිසා.
“මම මංගල යෝජනා කිහිපයක්ම බලන්න ගියා. ඒ කිසිම කෙනෙකුට මාව තේරුම් ගන්න පුළුවන් කියලා මම හිතුවේ නෑ. හැබැයි මට ඔයාව හොඳ යාළුවෙක් වගේ දැනෙනවා. හොඳ යාලුවන්ටත් එකට ජීවත්වෙන්න බැරි කමක් නෑ නේද?”
ඉසුරු එසේ අසද්දී නිමාලි කළේ මඳ සිනාවක් පළ කිරීම පමණයි. කඩවසම් ඉසුරුට ඇගේ හිත බැඳි ගොස් තිබුණා. ඇය යෝජනාවට කැමති බව අම්මාට පැවසුවේ ඒ නිසා.
“දෙන්න හිනා හිනා වෙවී කතා කර කර ඉන්නකොට අපි නම් ඕක හිතුව. අන්න ඒ ළමයත් කැමතියි කියලා දන්වලා එවලා. ඒ විතරක් නෙමෙයි ඉසුරුලගෙ අම්මා කේන්දර බලලා. උඩින්ම ගැළපෙනවලු.”
නිමාලිගේ අම්මා මහත් සතුටකින් පැවසුවා.
සුන්දර විවාහ මංගල්‍යයකට පසු නිමාලි සහ ඉසුරු විවාහපත් වුණා. විවාහ වන තුරුම නිමාලිට ඉසුරුව දැනුණේ හොඳ මිතුරෙක් ලෙස. ඔහුගේ ආදරය ඇය විවාහ දිනයේ බලාපොරොත්තු වුණා. නමුත් ඇගේ සිහිනය බොඳ වී ගියේ මධුසමයේ දී.
“මට සමාවෙන්න නිමාලි. මට ඔයාගේ වෙන්න හිත හදා ගන්න කාලයක් ඕන.”
ලිංගික සබඳතාවයක් තබා හාද්දක් හෝ පිරිනමන්නට උනන්දුවක් නැතුව ඉසුරු එසේ පැවසුවා. ඔහු ඇය සිටින ඇඳෙහිම නිදාගත්තේ පිටස්තරයෙක් ලෙසටයි.
“ඔයාගේ හිත හැදෙන්නේ කවද්ද?”
මාස දෙක තුන ගෙවී යද්දී නිමාලි එසේ අසන්නට වුණා. ලෝකයට ඉසුරු ඉතා හොඳ සැමියෙක්. ඔහු නිමාලිට සියළු යුතුකම් ඉටු කළා. උයමන් වලට පවා හොඳ සහයෝගයක් ලබා දුන්නා. කිසිම අවස්ථාවක ඇගේ හිත රිදෙන වචනයක්වත් ඔහු පැවසුවේ නෑ. ඇයට කුඩා දුරක්වත් පයින් යන්නට ඉඩ තැබුවේ ද නෑ. ඔහු ඇයට හැම සැපපහසුකමක්ම සැලසුවත් ඇගේ හිත තදින් රිදවමින් සිටියා.
“ඔයා රෑ වෙනකම් කෝල් කරන්නේ කාටද?”
දිනක් එහෙම අහන්නට නිමාලිට සිදු වුණේ දින කිහිපයක සිට ඉසුරු සාලයට වී මැදියම් රැය දක්වා චැට් කරන බව වැටහුණු නිසා.
“මං ඔයාට ඇත්ත කියන්නද?”
ඉසුරු එසේ ඇසුවේ වේදනාත්මක බැල්මකින්. අනතුරුව ඔහු නිමාලිගේ අතකින් අල්ලා ගත්තා.
“පාරමී ආපහු ආවා නිමාලි. මට එයාට ආදරේ නොකර ඉන්න බෑ.”
එය විවාහක බිරිඳකට අසන්නට පහසු කතාවක් නොවේ. ඇය කඳුළු සඟවා ගත්තා. වසර ගණනක් ආදරය කළ පෙම්වතිය වෙතට සැමියා යන බව දැන් නිමාලි හොඳින්ම දන්නවා.
“ඔයාගේ සතුටට බාධා කරන්න මට බෑ ඉසුරු. අපි ඩිවෝස් වෙමු. මට මෙහෙම ඔයාගේ වයිෆ් වෙලා ඉඳගෙන ඔයාට පාරමී ආස්සරේ කරන්න දෙන්න බෑ.”
නිමාලි එසේ පැවසුවේ වේදනාවෙන්.ඇයට ඉසුරුගෙන් සමු ගැනීම අපහසුයි. නමුත් කිසිම කායික සබඳතාවයක් නැතුව ගෙවී යන මේ සම්බන්ධතාවයේ අවසානය ගැන ඇයට කිසිම අදහසක් තිබුණේ නෑ.
“මම අපේ අම්මා එක්ක කතා කරන්නං”
ඉසුරු එසේ පවසා ඔහුගේ අම්මා මුණ ගැසෙන්නට ගියා. ඔහු අම්මා සමඟ කතා කළේ දික්කසාදය සම්බන්ධවයි. අම්මා දේවාලයේ කපුවෙකු මෙන් පරල වුණා.
“එහෙම දික්කසාද වෙන්න උඹට අමු කැවිලද? මං වසක් විසක් කාලා දිවි නහ ගන්නවා දැන ගනින්. නිමාලි ළමයා එක්ක හොඳින් ජීවත් වෙනවා මිසක දාලා ගිහින් ආපහු ආපු හැපින්නියෝ ළං කරගන්න උඹට පුලුවන් ද?”
අම්මා එසේ කෑගසන්නට වුණේ ඉසුරුව සම්පූර්ණයෙන් අවුල් කරමින්. ඇය දික්කසාද නොවන්නැයි ඉසුරුට ආයාචනා කරන්නට වුණා. තර්ජනය කරන්නට වුණා.
“කසාද බැන්දට පස්සෙ මිනිහා පිට යන එකට වග කියන්න ඕන ගෑනි. මේවා ඔය ළමයගෙත් වැරදි. රට්ටු ලවා අපිටයි ඔය ළමයගෙ ගෙදරටයි ලැජ්ජා නොකර ඉන්නවා ළමයෝ”
ඇය අවසානයේ නිමාලිට චෝදනා කරන්නට වුණා.
“නිමාලි කියන්නේ ඕනෑවටත් වඩා ඉවසන ළමයෙක්. එයාට නිකං චෝදනා කරන්න එපා අම්මෙ. මං තාම පාරමීට ආදරේ කරන එකම එයාට ඩිවෝස් එක ඉල්ලන්න හේතුවක්. ඒත් එයා එහෙම කරන්නේ නෑ.”
නිමාලි වෙනුවෙන් ප්‍රේමයක් හිතේ නැති වුණත් ඇය ගැන ඉමහත් ගරුත්වයක් ඇති ඉසුරු ඇය වෙනුවෙන් පෙනී සිටියා. ඔහු ඒ හන්දා අම්මාට නිමාලිට දොස් නගන්නට ඉඩ තැබුවේ නෑ.
“මං මැරෙනවා උඹ ඩිවෝස් වුණොත්”
Saru FM Media
