අකුරැස්ස මත්ස්‍යයින් අලෙවි කරන වෙළෙඳපොළක් ඉදිරිපිට මාළු ව්‍යාපාරිකයින් දෙපිරිසක් අතර ඇති වූ ගැටුමකින් තිදෙනෙකු බරපතළ තුවාල ලබා රෝහල්ගත කර තිබෙනවා.
අකුරැස්ස – තිබ්බටුවාව ප්‍රදේශයේ මාළු ව්‍යාපාරිකයෙකු හා අකුරැස්ස පොදු වෙළෙඳපොළ භූමිය ඉදිරිපිට මාළු වෙළෙඳාමේ නිරත පිය පුතු දෙදෙනකු අතර මෙලෙස ගැටුම හටගෙන ඇති බවයි දසත වාර්තාකරු පැවසුවේ.
එහිදී දෙපාර්ශ්වය විසින් තියුණු පිහි උපයෝගී කරගනිමින් එකිනෙකාට පහර දී තිබෙනවා.
එම දර්ශන අසල සවිකර තිබූ ආරක්ෂිත කැමරාවල ද සටහන් ව ඇති අතර මෙම සිද්ධියට අනුබල දුන් අයෙක් ද අකුරැස්ස පොලිසිය අත් අඩංගුවට ගෙන ඇති බවත් වාර්තා වනවා.
පළමු ව පහර දුන් මාළු ව්‍යාපාරිකයා ත්‍රීරෝද රථයකින් පැමිණ සෙසු පුද්ගලයාට ඔහුගේ මාළු ලෑල්ලේ තිබූ පිහියක් ගෙන පහර එල්ල කර ඇති බවයි වාර්තා වන්නේ.
මෙම සිදුවීමට හේතුව පරණ කෝන්තරයක් බවත් අනාවරණය වී තිබෙනවා.
සිය පුතුට පහර පිට පහර දෙන සිද්ධිය දුටු පියා සිය මාළු පිහිය රැගෙන විත් ආරවුල්කරුට පහර දී තිබෙන බවත් එය වැළැක්වීමට අසල මාළු හලේ සිටි තවත් අයෙකු මැදිහත් වුව ද එය අසාර්ථක වී ඇති බවත් හෙළි ව තිබෙනවා.
මෙම සිද්ධියෙන් තුවාල ලබා ඇත්තේ 33 හැවිරිදි පුතු හා 57 හැවිරිදි ඔහුගේ පියා යි.
පුත්‍රයාගේ එක් අතක ඇඟිල්ලක් වෙන් වීමට ම පහර වැදී ඇති බවත් පියාගේ එක් අතක් වෙන් වන ලෙසින් කැපී ඇති බවත් ඔවුන් ව කරාපිටිය ශික්ෂණ රෝහලට සහ මාතර මූලික රෝහලටත් ඇතුළත් කර ඇති බවත් පැවසෙනවා.
මේ වනවිට ඔවුන් දෙදෙනා ම ශල්‍යකර්ම කිහිපයකට භාජනය කර ඇති බවයි වාර්තා වන්නේ.
අකුරැස්ස පොලීසිය මේ පිළිබඳව වැඩිදුර විමර්ශන සිදු කරනවා.
Saru FM Media
