අලුත් අවුරුදු නිවාඩු කාලය තුළ 100kw ට වැඩි සූර්ය බල නිෂ්පාදකයන් විසින් ජනනය කරනු ලබන විදුලිය ජාතික විදුලිය පද්ධතියට ලබා ගැනීම අත්හිටුවීමට ලංකා විදුලි බල මණ්ඩලය පියවර ගෙන ඇති අතර, එම තීරණය හේතුවෙන් සූර්ය බලශක්ති කර්මාන්තයට විශාල පාඩුවක් සිදුවන බව පැවසෙයි.
ලංකා විදුලිබල මණ්ඩලය විසින් අප්‍රේල් 10 වන දා සිට දින 12ක කාලයක් සඳහා ගෙන ඇති මෙම තීරණය හේතුවෙන් කිලෝ වොට් 100කට වැඩි සූර්ය බල විදුලි පද්ධති හිමියන්ට පාඩු වන මුදල වන්දියක් ලෙස ලබා දෙන ලෙස සූර්ය බලශක්ති කර්මාන්තකරුවන් ලංකා විදුලිබල මණ්ඩල සභාපතිවරයාගෙන් ඉල්ලීමක් කර තිබේ.
සූර්ය බල කර්මාන්තකරුවන්ගේ සංගමයේ නිවේදනයකට අනුව, අප්‍රේල් මස 10 වන දා සිට අප්‍රේල් මස 21 වන දා දක්වා කාලය තුළ කිලෝ වොට් 100ට වැඩි සූර්ය විදුලි ජනන පද්ධති මගින් විදුලිය ලබා නොගන්නා බව දැනුම් දී ඇති අතර, මේ වන විටත් එම පද්ධති විසන්ධි කර තිබෙන බව වාර්තා වේ.
මෙම තත්ත්වය යටතේ, සූර්ය බල කර්මාන්තකරුවන්ගේ සංගමය ලංකා විදුලිබල මණ්ඩලයේ සභාපති ආචාර්ය තිලක් සියඹලාපිටිය වෙත විධිමත් ලිපියක් යොමු කරමින් ඉල්ලා ඇත්තේ, එයින් කර්මාන්තයට සිදුවන පාඩුව සලකා බලා, ඒ සඳහා සුදුසු වන්දියක් ලබා දීමට පියවර ගන්නා ලෙසයි.
සූර්ය බල කර්මාන්තකරුවන්ගේ සංගමයේ ප්‍රකාශකයෙකු සඳහන් කර ඇති ආකාරයට, මෙවැනි සූර්ය බල උත්පාදකයෙකුට හිමිවන ආදායමින් සියයට 35ක් පමණ ලංකා විදුලිබල මණ්ඩලය ගෙන තිබෙන තීරණය හේතුවෙන් අහිමි වන බවත්, එය රුපියල් මිලියන 600ක පමණ පාඩුවක් බවත් පෙන්වා දී තිබේ.
වාර්තා වන ආකාරයට, ආයෝජකයන් විසින් සූර්ය පැනල විදුලි නිෂ්පාදනය සඳහා රුපියල් බිලියන 200කට අධික විශාල මුදලක් ආයෝජනය කර ඇති බැවින් මෙලෙස වන්දියක් ලබා දෙන ලෙසට සූර්ය බලශක්ති කර්මාන්තකරුවන්ගේ සංගමය ඉල්ලීම් කර ඇත.
ජාතික වාණිජ මණ්ඩලයේ උපසභාපති ආචාර්ය ලක්මාල් ප්‍රනාන්දු මෙම තත්ත්වය සම්බන්ධයෙන් අදහස් දක්වමින් පැවසුවේ,
මෙම තීරණය හේතුවෙන් සූර්ය පැනල ආයෝජකයන්ට විශාල පාඩුවක් සිදුවන බවයි.
ඔහු වැඩිදුරටත් පෙන්වා දුන්නේ, වර්තමානයේ සූර්ය පැනල කට්ටල මගින් මෙගා වොට් 1500කට වැඩි ප්‍රමාණයක් ජාලගත කර ඇති බවත්, දැනට ජාලගත කර තිබෙන පරිමාවෙන් විසන්ධි කිරීමට ලක්වන්නේ 25%ක් යැයි අනුමාන කළහොත් මෙම පාඩුව සිදුවන බවත්ය.
ආචාර්ය ලක්මාල් ප්‍රනාන්දු මහතා තවදුරටත් පෙන්වා දුන්නේ, අලුත් අවුරුදු දීර්ඝ නිවාඩුවක් හේතුවෙන් විදුලිබල මණ්ඩලය මෙම තීරණය ගෙන ඇති බවත්, රජයේ නිවාඩුවක් යෙදෙන සෑම අවස්ථාවකම මෙම ක්‍රමය ක්‍රියාත්මක කිරීමට කටයුතු කළහොත් සූර්ය බලශක්ති නිෂ්පාදනයට ආයෝජනය කිරීමට ආයෝජකයින් ඉදිරිපත් නොවනු ඇති බවත්ය.
මෙම තීරණය පිළිබඳව විදුලිබල මණ්ඩලය විසින් නිල නිවේදනයක් නිකුත් කර නොමැති අතර, සූර්ය බලශක්ති කර්මාන්තකරුවන්ගේ ඉල්ලීම සම්බන්ධයෙන් ද මෙතෙක් ප්‍රතිචාර දක්වා නොමැත.
සූර්ය බලශක්ති යනු ශ්‍රී ලංකාව තුළ දිනෙන් දින ප්‍රචලිත වන පුනර්ජනනීය බලශක්ති ප්‍රභවයක් වන අතර, රජය සහ විදුලිබල මණ්ඩලය විසින් ද මෙම ක්ෂේත්‍රයට ආයෝජනය කිරීම සඳහා ජනතාව දිරිමත් කරමින් සිටියි. කෙසේ වෙතත්, මෙවැනි තීරණ මගින් ආයෝජකයින් අධෛර්යමත් වන බව කර්මාන්ත නියෝජිතයින්ගේ අදහසයි.
මෙම තත්ත්වය සම්බන්ධයෙන් ඉදිරි දිනවල සාකච්ඡා පැවැත්වීමට අපේක්ෂා කරන අතර, විදුලිබල මණ්ඩලය සහ සූර්ය බලශක්ති කර්මාන්තකරුවන් අතර සුහදශීලී විසඳුමකට එළඹීමේ අවශ්‍යතාවය පෙන්වා දෙයි.
Saru FM Media
