කැලණිය ප්‍රාදේශීය ලේකම් කොට්ඨාශයේ පිහිටි රජයේ ඉඩමක් අයුතු ලෙස අත්පත් කර ගැනීමේ චෝදනාවකට අදාළව හිටපු අමාත්‍ය ප්‍රසන්න රණවීර මහතා විසින් ඉදිරිපත් කරන ලද රිට් පෙත්සමක් අභියාචනාධිකරණය විසින් විභාගයට නොගෙන නිෂ්ප්‍රභ කිරීමට තීරණය කර තිබේ.
අභියාචනාධිකරණයේ සභාපති විනිසුරු මොහොමඩ් ලෆාර් තාහීර් මහතා සහ විනිසුරු ප්‍රියන්ත ප්‍රනාන්දු මහතාගෙන් සමන්විත විනිසුරු මඩුල්ල විසින් මෙම නියෝගය ප්‍රකාශයට පත් කරන ලදි.
හිටපු අමාත්‍ය ප්‍රසන්න රණවීර මහතා සිය රිට් පෙත්සමේදී ඉල්ලා සිටියේ අදාළ සිද්ධියට සම්බන්ධයෙන් ඔහුව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙසයි. නමුත් අභියාචනාධිකරණය විසින් එම ඉල්ලීම ප්‍රතික්ෂේප කරමින් පෙත්සම සම්පූර්ණයෙන්ම නිෂ්ප්‍රභ කිරීමට තීරණය කර ඇත.
එම සිද්ධියට අදාළව හිටපු අමාත්‍ය මර්වින් සිල්වා මහතා ඇතුළු පිරිසක් දැනට මහර මහෙස්ත්‍රාත් අධිකරණය මගින් රක්ෂිත බන්ධනාගාර ගත කර සිටින බවද වාර්තා වේ.
කැලණිය ප්‍රාදේශීය ලේකම් කොට්ඨාශයේ පිහිටි රජයේ ඉඩම් අයුතු ලෙස අත්පත් කර ගැනීමේ චෝදනාව සම්බන්ධයෙන් පරීක්ෂණ දිගටම පැවැත්වෙන අතර, මෙම නඩුවට අදාළ වැඩිදුර කරුණු ඉදිරි දිනවලදී අධිකරණය හමුවේ ඉදිරිපත් කිරීමට නියමිතය.
Saru FM Media
